Лаўрэт прэміі імя Міхася Стральцова быў абвешчаны сёння ў Вільні на штогадовым міжнародным паэтычным фестывалі «Вершы на асфальце». Ім стаў паэт і перакладчык Юрась Пацюпа. Яго кніга мае назву «Рой».

Кніга змяшчае амаль поўны збор паэтычных тэкстаў Юра Пацюпы, куды ўвайшлі раней друкаваныя зборнікі «Ноч» і «Сабака», а таксама намеркаваныя — «Сад» і «Рута». Многія вершы публікуюцца ўпершыню. Другую частку зборніка склалі выбраныя літаратуразнаўчыя артыкулы і эсэ, напісаныя на працягу трыццаці гадоў. Усе тэксты прагледжаныя і адрэдагаваныя аўтарам спецыяльна для гэтага выдання.

Набыць кнігу можна тут.

Прэмія ўручаецца ў шосты раз, другі раз запар фестываль праходзіць не ў Беларусі. Сёлетні лаўрэат Юрась Пацюпа не змог прыехаць у Літву. Прэмію ў Мінску яму ўручыць удава Міхася Стральцова Алена.

Гурт «Беларускі цуд» адкрывае фэст

На адкрыцці выступае кіраўнічка Саюзу літоўскіх пісьменнікаў Бірутэ Ёнушкайтэ-Аўгусцінене (Birutė Jonuškaitė-Augustinienė)

Вядоўца вечара мастацтвазнаўца Сяргей Харэўскі

Лаўрэат першай прэміі Стральцова паэт Алег Мінкін чытае свае вершы

Выступае паэт Уладзімір Някляеў

Кіраўнічка Шведскага саюзу пісьменнікаў Грэтэ Ротбёль (Grethe Rottböll) і паэт, перакладчык Дзмітры Плакс

Выступае паэт, літаратуразнаўца Міхась Скобла

Штогадовы Міжнародны паэтычны фестываль імя Міхася Стральцова «Вершы на асфальце» запачаткаваны ў 2012 годзе ГА «Саюз беларускіх пісьменнікаў» і Беларускім ПЭН-цэнтрам. У розныя гады ўдзельнікамі фестывалю былі паэты з Беларусі, Германіі, Ісландыі, Казахстана, Літвы, Латвіі, Нарвегіі, Польшчы, Расіі, Славакіі, Украіны, Швецыі, Фінляндыі, Эстоніі. Сярод традыцыйных мерапрыемстваў фестывалю — паэтычныя чытанні, круглыя сталы і дыскусіі, прэзентацыі кніг арыгінальнай і перакладной паэзіі, кніжных серый, музычныя выступы і г.д. Сёлета асноўным арганізатарам фэсту з’яўляецца Міжнародны саюз беларускіх пісьменнікаў. Партнёрамі і суарганізатарамі фестывалю выступаюць Літоўскі саюз пісьменнікаў, Шведскі саюз пісьменнікаў, Нарвежскі саюз пісьменнікаў, грамадская культурніцкая кампанія «Будзьма беларусамі!», Віленскі беларускі музей імя І. Луцкевіча, Цэнтр беларускай супольнасці ў Вільні, Літоўскі пісьменніцкі клуб, клуб «Павільёнас».