Мабільны дадатак «Pro Мова» для трэніроўкі і пацверджання валодання беларускай мовай у сваёй сферы дзейнасці распрацавала некамерцыйная ўстанова «СЭЙ БАЙ».
«Pro Мова» удалося зрабіць пры падтрымцы неабыякавых беларускіх арганізацый, кампаній, валанцёраў. Ён з’яўляецца неад’емнай часткай узаемазвязаных праектаў, прысвечаных адраджэнню жывой роднай мовы.
Стваральнікі праекта прапануюць дапамагчы ў адраджэнні беларускай мовы наступнымі дзеяннямі:
- Прайсці сертыфікацыю Mova.pro для сябе і выкарыстоўваць беларускую пры нагодзе на сваёй працы і дома.
- Зайсці на donar.by і пачаць агучваць сказы. Гэта таксама праект SAY.BY для тых, хто жадае прыняць удзел у адраджэнні беларускай мовы. Падчас першага марафону і далей беларусы ўжо назбіралі амаль 500 гадзін маўлення! У другім марафоне агучвання таксама прапануюцца сказы для праекта Мова прафесіі, каб заданні для вывучэння беларускай мовы для розных сфер дзейнасці гучалі вашымі галасамі! Арганізатары ставяць мэту дабрацца да 1000 гадзін маўлення.
- Карыстацца паслугамі ўстаноў, дзе ёсць беларуская. Спіс такіх устаноў — па спасылцы.
- Падтрымаць распрацоўку новай сферы Мовы прафесіі. Можаце скласці сферу для Мовы прафесіі, у якой вы працуеце.
- Далучыцца да каманды SAY.BY.
