Паэт Міхась Скобла і салістка Беларускай дзяржаўнай філармоніі Таццяна Матафонава наведалі Ашмянскі і Валожынскі раёны. Сустрэчы адбыліся ў школе №2, у Школе-інтэрнаце Ашмянаў, у летніку “Замасцяны” Ашмянскага раёну, а таксама на геастанцыі “Заходняя Бярэзіна” на Валожыншчыне, дзе праходзяць практыку студэнты геаграфічнага факультэта БДУ.
Сваімі ўражаннямі ад паездкі падзялілася Таццяна Матафонава: “Ашмяны – мой родны горад, у свой час я скончыла другую школу, і таму з асаблівым хваляваннем пераступіла яе парог. Упершыню спявала ў роднай школе, прыемна, што прыйшлі мае настаўнікі, а ў летнік прыехалі мае бацькі. Гэта была своеасаблівая творчая справаздача перад землякамі. Здаецца, яна прайшла ўдала”.
Міхась Скобла найбольш уражаны сустрэчай са студэнтамі-географамі: “16 чэрвеня цэлы дзень ішоў дождж, але мне здалося, што свяціла сонца, – столькі вакол было прыязных усмешак, родных беларускіх твараў! Было ўсцешна назіраць, як яны ахвотна падпявалі “Купалінку”, “Спадчыну” Я. Купалы… А потым нават старажытныя беларускія танцы развучылі. Ойру танчылі і студэнты, і выкладчыкі, і намеснік дэкана. Асабліва было прыемна чуць ад іх маладое, энэргічнае беларускае слова”.
На фота: Пасля творчай сустрэчы на Валожыншчыне.
