Кулінарных кніг з кожным годам становіцца ўсё больш і больш. Экзатычныя стравы, мудрагелістыя рэцэпты, незвычайныя для нашага краю прадукты…. Так, гэта, безумоўна, разнастайвае наш стол. Але ў пагоні за модай мы забываемся, з чаго ўсе пачыналася. А калі зазірнуць у гісторыю нашай роднай кухні, то ўбачыш сапраўды несамавітыя рэчы.
У гэтым нам дапамагае новая неверагодная кніга – “Літвінская кухня”. Вельмі шаноўны майстар кулінарнае справы Кухмістр Верашчака адкрывае для чытачоў велізарны пласт папросту сенсацыйных звестак пра вядомыя-забытыя-невядомыя стравы з зямель колішняга Вялікага княства Літоўскага, гэта значыць – з нашых беларускіх зямель.
Паглядзіце, як пачынае свой аповед пан Верашчака: “А ведаеце, панове, як даўней елі і пілі ў добрых шляхецкіх дамах старой Літвы? Ну, напрыклад, напрыканцы 1820-х гадоў, у залатыя бесклапотныя часы, дзе-небудзь у Наваградскім або Слонімскім павеце?” І сапраўды, ці добра вы ведаеце, як гатавалі зразы ў радзівілаўскіх маёнтках? Ці што можна зрабіць са звычайнага бацвіння? А гісторыя халадніка напісана так смачна, што так і хочацца бегчы на кухню гаспадарыць…
“Літвінская кухня” выходзіць эксклюзіўна ў электронным выглядзе. Нягледзячы на гэта, у ёй шмат ілюстрацый, якія дапамогуць вам лепей зразумець тэкст. На любой вашай электроннай прыладзе заўсёды будзе пад рукой любімы рэцэпт, вы лёгка і паўсюль зможаце паглядзець у спіс інгрэдыентаў, якія вам спатрэбяцца, каб прыгатаваць шыкоўныя стравы і здзівіць сваім умельствам блізкіх і знаёмых.
Дарэчы, яшчэ да выхаду кніга нарабіла шмат шуму ў сацыяльных сетках і выклікала непадробную цікавасць. Яе абмяркоўваюць, чакаюць і ўжо рыхтуюць начынне на кухні… Паверце, да яе ўжо цяпер няма абыякавых.
Такім чынам, трымайце сапраўдную “Літвінскую кухню” ад славутага пана Кухмістра Верашчакі.
Спампаваць яе можна тут.
