Арганізатары фестывалю Tallinn Music Week абвесцілі імёны 237 артыстаў з 33 краін, якія з 31 сакавіка па 2 красавіка выступяць у сталіцы Эстоніі ў межах найбуйнейшага фэста новай музыкі ў скандынаўска-балтыйскім рэгіёне. Беларусь будуць прадстаўляць: Awlnight, ili-ili, Shaman Jungle, Evand.

Заяўкі на ўдзел у мерапрыемства даслалі 1470 калектываў. Найбольшую колькасць у выніковым спісе традыцыйна маюць гаспадары мерапрыемства – 114 выканаўцаў. Фінляндыя – 23, Расія – 19, Вялікабрытанія і Польшча – па 7, Данія – 6. У Канады, Швецыі, Нямеччыны – па 5.

Awlnight

Абраныя беларускія артысты прадстаўляюць цалкам розныя музычныя плыні: Awlnight – хіп-хоп/электроніку, ili-ili – поп-рок, Shaman Jungle – world music,

Evand

– неакласіку. Для Awlnight гэта ўжо другая паездка на Tallinn Music Week. Акрамя гэтага ён нядаўна выступаў на фестывалі MENT Ljubljana ў Славеніі. Для астатніх гэта будзе першая паездка на еўрапейскія шоўкейс-фестывалі. Партнёрам мерапрыемства ў Беларусі з’язляецца праект Experty.by.

ili-ili

– Мы атрымалі з Беларусі 86 заявак і ў чарговы раз пераканаліся, што вы маеце моцную музычную сцэну. Паўторнае запрашэнне Awlnight – рэдкая з’ява, якая сведчыць, наколькі артыст спадабаўся арганізатарам і публіцы, – кажа праграмны дырэктар фестывалю Tallinn Music Week Райманд Пылдмаа.

Shaman Jungle

З мінулага году Tallinn Music Week пазіцыянуецца, як гарадскі фестываль, які акрамя трох дзён клубных канцэртаў і прафесійнай музычнай канферэнцыі змяшчае тыднёвую праграму рэстаранаў, мастацтваў, гарадскіх сцэн, дызайн-маркет і іншыя актыўнасці. У гэтым годзе на мерапрыемстве ўпершыню будзе адмысловая праграма для моладзі і дзяцей.

У пошуках новай публікі і прафесійных кантактаў на фестываль прыязджаюць у тым ліку вядомыя ў сваіх краінах артысты. У гэтым годзе на ім выступяць гурт Onuka (Украіна), удзельнік Einstuerzende Neubauten Аляксандр Хакэ, вядомая па супрацоўніцтву з Пітэрам Гэбрыэлам шведская спявачка Джэні Абрахамсон і іншыя музыкі.

Квіток на ўсе дні і ўсе канцэрты Tallinn Music Week каштуе 60 еўра. Квіток на канцэрты і прафесійную канферэнцыю каштуе 250 еўра. Продаж і дадатковая інфармацыя на сайце www.tmw.ee. У гэтым годзе ўпершыню ладзіцца аўтобусны тур на фестываль з Мінска. Кошт – 190 еўра на чалавека з транспартам, квітком на канцэрты і жытлом. Падрабязна  – https://www.balkiproject.com/travel.