У эпоху Digital трэба быць мабільным, хуткім і трэндавым. Больш за ўсё гэта тычыцца тых, хто трымае руку на пульсе нашага жыцця, – журналістаў, якія паціху ператвараюцца ў нейкіх мультымедыйных гуру. Тое ж самае тычыцца і літаратараў, бо вялікая насычанасць падзей і інфармацыі не дазваляе ўсё ўтрымаць у галаве.
Менавіта таму мы зрабілі падборку найлепшых сэрвісаў і праграм для журналістаў і пісьменнікаў.
Google docs
Праграма, без якой увогуле немагчыма ўявіць жыццё любога чалавека, які працуе з літарамі, – тэкставы рэдактар. І ўсё ж найлепшым мабільным рашэннем тут з’яўляюцца “Дакументы” ад Google. Па-першае, яны мультыплатформенныя. Для карыстання на камп’ютары вам нават не трэба яго пампаваць – дастаткова зайсці на сайт, і паўнавартасны рэдактар гатовы да працы! А для мабільных платформ дастаткова спампаваць даволі малую па памеры праграму. Па-другое, яна мае бясплатную сінхранізацыю з вашым акаўнтам Google. Менавіта таму вашыя запісы ніколі не згубяцца, а для працягу працы на іншай прыладзе нічога не трэба пампаваць – усё заўсёды пад рукой. Ну, і самая галоўная фішка – анлайн-рэдагаванне. Дакументамі можна дзяліцца з іншымі карыстальнікамі. Такім чынам, вы заўсёды можаце працаваць над файлам разам з рэдактарам ці калегам.
Таксама можна дадаць простасць інтэрфейсу, дзе няма нічога лішняга. Канечне, тут далёка не ўсе функцыі “стацыянарнага” офіснага пакета, але для напісання і рэдагавання “Google docs” могуць стаць выдатным памочнікам.
Feedly
Каб быць у трэндзе і курсе падзей, даводзіцца пастаянна чытаць адразу некалькі крыніц інфармацыі і адсочваць важныя навіны. Раней для гэтага выкарыстоўвалі RSS, але яго часы мінулі. Таму замест бясконцых закладак у браўзеры раім вам карыстацца Feedly. Гэты сэрвіс дазваляе вам стварыць свой асабісты агрэгатар навінаў, дзе вы самі абіраеце патрэбныя вам вэб-рэсурсы. Праграма дазваляе ствараць тэматычныя падборкі, чытаць свежыя артыкулы ў вельмі прыемным дызайне. Таксама вы можаце адкласці на потым ці захаваць тэксты, на якія не хапіла часу, альбо тыя, што яшчэ спатрэбяцца. А платныя падпіскі дазволяць вам атрымліваць статыстыку, трэнды і шмат іншай карыснай інфармацыі для медыйшчыка. У сэрвісу ёсць як вэб-версія, так і праграма для мабільных платформ.
Google trends
Гугл-трэнды – спецыяльны сэрвіс для тых, каму цікавыя трэнды, што бачна з самой назвы. Гэты сайт дазволіць вам правяраць папулярнасць тых ці іншых тэм і запытаў у пошукавіку Google. Апроч дынамікі папулярнасці можна праверыць зацікаўленасць дадзенай тэмай па краінах і іх рэгіёнах, што можа быць вельмі карысна для вылучэння трэндаў і таго, што хвалюе людзей. Таму, калі ведаць, як гэта выкарыстоўваць, дадзены сэрвіс можа стаць моцнай зброяй у медыйных руках.
Google keep
І яшчэ адзін сэрвіс must have ад пошукавага гіганта. Насамрэч ён падыдзе абсалютна любому крэатыўшчыку і чалавеку, які імкнецца захаваць свае планы і думкі. Google keep – вашае асабістае сховішча нататак, лістоў, спраў, патрэбных фотаздымкаў, малюнкаў, проста думак, а таксама вэб-старонкі. Прыгожы дызайн у выглядзе картак прываблівае вока, а магчымасць пазначаць патрэбныя вам рэчы колерамі і замацоўваць зверху дадае практычнасці гэтаму сэрвісу. І самае галоўнае – уся інфармацыя захоўваецца ў воблаку вашага акаўнта Google, што дазваляе не згубіць нічога важнага. Сэрвіс працуе як у браўзеры, так і на мабільных прыладах.
Office lens
Выдатны фотасканэр для мабільных прыладаў ад Microsoft. Апроч таго, што праграма аўтаматычна захоплівае межы патрэбнага вам дакумента ці замалёўкі (не без памылак, але гэта ўручную выпраўляецца), яшчэ тут працуе спецыяльны алгарытм, які сапраўды выдае ў выніку прыкладна такую ж дакладнасць і якасць, як і сканэр. У праграмы мінімалістычны і просты інтэрфейс, таму доўга разбірацца не давядзецца.
Telegram
Што тут робіць Тэлеграм? А ўсё проста! Менавіта ён дазваляе весці дыялогі і перамовы без чагосьці лішняга, ды яшчэ і з нейкай прыватнасцю. Але насамрэч тут варта звярнуць увагу на Telegram-каналы і Telegram-ботаў, якія ўсё больш набіраюць папулярнасць. Сярод іх разнастайнасці вы можаце як знайсці аператыўныя навіны, так і атрымаць цікавую і карысную інфармацыю па вашай прафесійнай і не толькі дзейнасці ад найбуйнейшых спецыялізаваных каналаў. І яшчэ вы можаце самі, без ведання моў праграмавання, стварыць свайго бота ці канал, што можа вам спрасціць дастаўку інфармацыі ці сувязь з аўдыторыяй. І менавіта гэтыя магчымасці прывялі Telegram у наш тулкіт. Сэрвіс мультыплатформенны, таму вы абавязкова знойдзеце патрэбнае вам.
Writeometer
Завяршае наш тулкіт вельмі матывавальная праграма, якая можа спатрэбіцца фрылансерам і пісьменнікам, – Writeometer. Калі казаць проста, то гэта спроба перамагчы вашу ляноту і ўзяцца за пісьмо. Усё, што вам трэба, – адкрыць сваю мэту (напісаць нейкую колькасць слоў альбо раздзелаў), прапісаць канчатковую і штодзённую мэту, выставіць дэдлайн і працоўныя гадзіны. І ўсё. З гэтага часу праграма будзе пастаянна нагадваць вам узяцца за справу, а калі яшчэ карыстацца віджэтам, то, зірнуўшы ў тэлефон, вы будзеце бачыць, колькі вам яшчэ трэба сёння напісаць. Толькі два мінусы: праграма не прымусіць працаваць, а яе функцыямі могуць карыстацца толькі ўладальнікі Android-прыладаў.
Глядзі таксама:
Найлепшыя сэрвісы і праграмы для мастакоў, дызайнераў і фатографаў
А калі вы ведаеце ці карыстаецеся больш рэдкімі, але не менш зручнымі сервісамі, дзяліцеся імі ў каментарах!
Багдан Сакалоў
