Скульптуру сімвала старадаўняга мястэчка, Міхала Арханёла, усталявалі ў двары колішняга дамініканскага кляштара ля касцёла ў Наваградку.
Фота: katolik.life
Фігура Арханёла — сімвал заступніка ўсіх, хто церпіць ад несправядлівасці — размешчана на сяміметровай калоне. Улічваючы тое, што Наваградак знаходзіцца на вышыні 292 метры над узроўнем мора і з’яўляецца самым высокім горадам Беларусі, скульптуру Арханёла Міхала можна ўпэўнена лічыць размешчанай вышэй за ўсе астатнія помнікі ў краіне.
Фота: katolik.life
Святы Міхал Арханёл з’яўляецца сімвалам горада — ягоная выява змешчана на гербе, нададзеным гораду вялікім князем літоўскім і каралём польскім Жыгімонтам Вазам 18 сакавіка 1595 года амаль праз стагоддзе пасля атрымання Наваградкам права на самакіраванне ў 1511. Выява наваградскага герба лічыцца адной з першых у геральдычнай традыцыі гарадоў Беларусі.
Выява герба Наваградка з вялікакняскага прывілею 1792
Невыпадковае і месца, дзе ўсталявана скульптура заступніка Наваградка — на тэрыторыі колішняга дамініканскага кляштара, ля барочнага касцёла Міхала Арханёла 1724 года пабудовы. Вядома, што ў дамініканскай школе пры кляштары вучыўся Адам Міцкевіч.
Фота budzma.org
«Нарэшце адбылася своеасаблівая інтранізацыя (уваходжанне на прастол, узвядзенне на трон) святога Арханёла Міхала над Беларуссю ў самым высока заселеным пункце ў краіне. Цяпер фігура нагадвае, хто заступаецца за наш край!», — паведаміў з нагоды усталявання скульптуры на сваёй старонцы ў facebook пробашч рыма-каталіцкай парафіі святога Міхала Арханёла ў Навагрудку ксёндз Юрый Жэгарын.
Фота katolik.life