6 верасня 2024 года ў Музеі Вольнай Беларусі адкрыецца выстава «Несціхаючыя галасы», прысвечаная ролі жанчын у беларускім дэмакратычным руху. Гэтая выстава з’яўляецца часткай шырокага праекту «Несціхаючыя галасы. Пашырэнне правоў і магчымасцяў жанчын у беларускай дэмакратыі», які накіраваны на глыбокае даследаванне, ацэнку і прасоўванне жаночай палітычнай актыўнасці ў сучаснай Беларусі.
«Несціхаючыя галасы» — выстава-нарыс і выстава-расповяд аб тым, як жанчыны, якія масава далучыліся да пратэстаў супраць несправядлівых выбараў у 2020 годзе, пачалі свядома адстойваць сваё права на ўдзел у фармаванні будучыні сваёй краіны. Іх палітычная трываласць, паслядоўнасць у выбары і мужнасць перад рэпрэсіямі раскрываюцца шляхам спалучэння мастацкага падыходу з дакументальным аналізам. У выніку атрымліваецца глыбокі і комплексны партрэт жанчын, якія няспынна і паслядоўна працуюць на будучую дэмакратычную Беларусь.
У экспазіцыі «Несціхаючых галасоў» — фотаздымкі і экспанаты з фонду Музея Вольнай Беларусі, а таксама арыгінальныя рэчы жанчын-удзельніц беларускіх падзей 2020–2024 гадоў, перададзеныя імі з прыватных калекцый.
Адкрыццё выставы — 6 верасня 2024 г. а 19:00.
Арганізатары выставы — Музей Вольнай Беларусі і Народнае антыкрызіснае ўпраўленне. Партнёр — ініцыятыва «Палітвязынка». Фінансавая падтрымка — Амбасада Канады ў Рэспубліцы Польшча і Канадскі фонд мясцовых ініцыятыў.
На афіцыйнай частцы адкрыцця выставы плануецца відэазварот нацыянальнай лідаркі Святланы Ціханоўскай, а таксама выступы спадарыні Кэтрын Годзін — Амбасадаркі Канады ў Польшчы і спадара Паўла Латушкі — намесніка Кіраўніцы Аб’яднагага Пераходнага Кабінета Беларусі, кіраўніка Народнага антыкрызіснага ўпраўлення.
Вядучая цырымоніі — Народная артыстка Беларусі, актрыса групы «Вольныя Купалаўцы» Зоя Белахвосцік.
Арганізатары звяртаюць увагу на тое, што відэазапіс і фатаграфаванне экспазіцыі і гасцей выставы будуць абмежаваны з меркаванняў бяспекі.
Выстава будзе працаваць з 7 па 22 верасня 2024 г.
Падчас працы выставы адбудзецца шэраг тэматычных мерапрыемстваў — лекцый, сустрэч і дыскусій. Першая сустрэча — куратарская экскурсія па выставе пройдзе 7 верасня, пачатак а 13-й.
Адрас: Музей Вольнай Беларусі, вул. Foksal 11, Варшава, Польшча
