Штогадовая акцыя “Птушкі ля кармушкі” пройдзе 19-20 студзеня. Яе праводзіць грамадская арганізацыя “Ахова птушак Бацькаўшчыны” (АПБ), каб даведацца колькі птушак зазімавала ў нашых садах і падворках.
Каб паўдзельнічаць у акцыі, трэба 19 і (або) 20 студзеня падлічыць віды і колькасць птушак на сваёй кармушцы на працягу адной гадзіны і перадаць дадзеныя арганізатарам. Для гэтага можна запоўніць простую форму або напісаць паведамленне ў FB або ВК.
Птушак можна лічыць і 3-4 гадзіны, але тады павінна быць 3-4 справаздачы, па адной для кожнай гадзіны.
Гэты метад называецца «народная навука». Калі тысячы людзей па ўсёй краіне лічаць птушак па адной методыцы, то дробныя памылкі ў адзначэнні відаў ці падліку птушак робяцца статыстычна неістотныя. Пасля акцыі мы зможам параўнаць колькасць розных птушак за розныя гады, калі праводзілася акцыя.
Сярод тых, хто дашле вынікі сваіх падлікаў праз форму, АПБ разыграе 10 значыкаў-птушак.
АПБ дае парады, як лічыць птушак і як змайстраваць кармушку, а таксама заклікае публікаваць птушыныя фота і відэа ў сацсетках з хэштэгам #птушкілякармушкі.
Універсальная падкормка для птушак – нясмажанае несалёнае насенне сланечніка. Да яго можна дадаваць неапрацаванае проса і авёс. Сініцы і дзятлы любяць таксама свежае несалёнае сала. Арнітолагі папярэджваюць, што любы хлеб птушкам шкодны!
Натхніцца для ўдзелу ў акцыі дапамогуць анлайн-кармушкі ў Белавежскай пушчы, адкуль ідзе жывая трансляцыя.
Дзяліцца ўражаннямі і здымкамі, дапамагаць адно аднаму з вызначэннем птушак можна ў тэлеграм-чаце “Ціў-ціў”.
Наталля Саракавік, спецыяліст АПБ па акцыях і кампаніях: “Мінулым разам падчас акцыі 2000 удзельнікаў пачаставалі больш за 8 000 птушак! Колькі птушак прыляціць на беларускія кармушкі і якія гэта будуць віды – дазнаемся ўжо 22 студзеня на сайце АПБ. Назіраць за птушкамі ля кармушкі – такое задавальненне, што ад гэтага відовішча проста не адарвацца. Здымайце сваіх мілых гасцей на фота ці відэа і змяшчайце ў сацсетках з хэштэгам #птушкілякармушкі, а таксама загружайце ў спецыяльны альбом у VKontakte. Аўтараў самых цікавых здымкаў чакаюць сувеніры ад АПБ!”
Паводле арганізатараў
