Размешчаны ў Дзятлаве былы палац Радзівілаў 29 лістапада прадалі з аўкцыёна. Унікальная гістарычная пабудова, якая мае 270-гадовую біяграфію, пайшла з малатка ўсяго за 100 рублёў. «Вячэрні Гродна» пагутарыў з пакупніком і даведаўся пра планы новага ўласніка адносна атмасфернага будынка.
Чаму так танна?
Пакупніка для палаца ў Дзятлаве шукалі некалькі гадоў. Аднак яшчэ ніводныя таргі не мелі поспеху, таму пачатковы кошт палаца да аўкцыёну, які адбыўся 29 лістапада, знізіўся да 3 базавых велічынь за ўвесь будынак (96 рублёў на сёння).
У выніку таргоў так і не было — зарэгістраваўся толькі адзін удзельнік. У такім выпадку аўкцыён не праводзяць, а адзіны прэтэндэнт даплачвае 5% да пачатковай сумы.
Сам палац знаходзіўся ва ўласнасці Дзятлаўскага раёна. Агульная плошча двухпавярховай пабудовы ў стылі барока — 1527 кв. метраў. У яго ёсць склеп і чатыры прыбудовы. Плошча самога ўчастка — 41 сотка. Пакупнік атрымаў гэтую зямлю ў арэнду тэрмінам на 50 год.
Хто стаў новым уласнікам?
Цяпер палац належыць бізнесмену з Расіі. Асабіста ён не змог прысутнічаць на таргах, таму яго інтарэсы прадстаўляла беларуска Святлана, якая выступала ў ролі даверанай асобы прадпрымальніка. Па ейных словах, яе кліент нарадзіўся не ў Беларусі і не жыў тут, аднак ён неаднаразова наведваў нашу краіну ў якасці турыста. Ён шануе даўніну і хоча захаваць культурную спадчыну для цяперашніх пакаленняў.
— Што менавіта з’явіцца там пасля рэканструкцыі, на дадзены момант вырашаецца і абмяркоўваецца. Аднак магу сказаць дакладна, што палац будзе мець толькі сацыяльную накіраванасць, аб камерцыялізацыі аб’екта размова не ідзе. Улічваючы, што там раней была бальніца, магчыма, з’явіцца рэабілітацыйны цэнтр ці іншая ўстанова для дапамогі людзям, — адзначыла Святлана.
Паводле яе слоў, нягледзячы на тое, што будынак пуставаў апошнія шэсць гадоў, ён захаваўся ў прыстойным стане.
Адзначым, што па ўмовах таргоў у новых уласнікаў ёсць не больш за два гады з дня заключэння дамовы куплі-продажу на тое, каб распрацаваць праектную дакументацыю на правядзенне рэканструкцыі або капрамонту.
Самі будаўнічыя працы трэба правесці ў тэрміны, пазначаныя ў праекце, аднак не пазней за пяць гадоў з дня заключэння дамовы.
Хто і калі пабудаваў палац
Як піша партал holiday.by, пасля Паўночнай вайны са шведамі ўладальнікамі Дзятлава стаў род Радзівілаў. Гісторыя будаўніцтва палацавага комплексу звязана з князем Ульрыкам Крыштафам Радзівілам. Яго бацька Мікалай Фаўстын Радзівіл пачаў узвядзенне палаца. У выніку ў 1751 годзе на месцы спаленага шведскімі войскамі драўлянага замка, быў пабудаваны шыкоўны двухпавярховы будынак, архітэктарам якога прынята лічыць Д. Фантана. Да канца XVIII стагоддзя побач з палацам быў абсталяваны парк і сажалка з масткамі, павільёнамі, якія не захаваліся.
У канцы XVIII стагоддзя палацава-паркавы комплекс Радзівілаў перайшоў ва ўладанне роду Солтанаў. Адам Солтан з’яўляўся ўдзельнікам паўстання ў 1831 г., і за яго ўдзел у мецяжы палацава-паркавы ансамбль быў канфіскаваны. Пасля ў будынку размяшчаліся казармы, затым школа, а ў 1930 годзе былы палац ператварылі ў прытулак для дзяўчынак. У 1950 годзе тут знаходзілася медыцынская ўстанова. Палацавы корпус і зараз практычна захоўвае першародны выгляд.
Чытайце яшчэ: «Лістападаўскае» паўстанне 1830 года супраць панавання Расіі: прычыны, падзеі і вынікі
