«Папярэдні тэрмін скончыўся 25 ліпеня, але Анджэй не выйшаў на свабоду», — напісала ў Facebook яго жонка Аксана Пачобут.
Фотаздымак са старонкі Анджэя Пачобута ў Facebook
«16 месяцаў!!! — піша Аксана. — За гэты час наш сын перагнаў па росце бабулю з дзядулем. З сынам не дазволена перапіска, бо Андрэй з яго нараджэння размаўляе з ім на польскай мове. Ён піша скаргі, якія адміністрацыя нават не выпускае з СІЗА.
У лістах піша, што не смуткуе, чытае кнігі і гатовы да горшага развіцця падзей. Перадае прывітанне ўсім знаёмым і незнаёмым асабіста людзям і дзякуе ўсім, хто не гледзячы ні на што працягвае пісаць...».
Анджэй Пачобут — гродзенскі журналіст і член «Саюза палякаў» у Беларусі. Яго затрымалі 25 сакавіка ў Гродне пасля працяглага ператрусу ў сваім доме. Журналісту прад’яўлена абвінавачанне па трэцяй частцы 130-га артыкула Крымінальнага кодэкса «Здзяйсненне групай асоб наўмысных дзеянняў, накіраваных на ўзбуджэнне нацыянальнай, рэлігійнай варожасці і варожасці па прыкмеце нацыянальнай, рэлігійнай, моўнай прыналежнасці, і здзяйсненне наўмысных дзеянняў па рэабілітацыі нацызму».
