Бывае, хочацца не замарочвацца са складанымі і доўгімі рэцэптамі, а прыгатаваць штосьці простае і галоўнае хутка! Для стравы, якую сёння прапануем прыгатаваць, у вас хутчэй за ўсё дома ёсць усе прадукты, а калі не — іх лёгка знайсці ў бліжэйшай краме. Паказваем відэарэцэпт «пастухоўскага гаршчочка», які гатуюць у духоўцы ці печы.
Страва, прыгатаваная ў полі
Першапачаткова такую страву, сыходзячы з назвы, гатавалі менавіта пастухі. Раней у кожнай больш-менш буйной вёсцы быў адзін ці некалькі пастухоў. Ранкам ён збіраў кароў аднавяскоўцаў і гнаў у поле пасвіцца, увечары пастух прыганяў жывёлаў гаспадарам.
Пастуху заўсёды давалі так званую «ссабойку». Звычайна гэта былі прадукты, што доўга не псуюцца: садавіна, гародніна, вяленае, вэнджанае ці салёнае мяса і хлеб. Каб паласавацца гарачай ежай у полі, пастухі бралі з сабой гаршчок, у якім на вогнішчы нешта гатавалі з прадуктаў, што далі з сабой. Так і з’явіўся «пастухоўскі гаршчочак».
Пастухі разводзілі агонь, нарэзаную гародніну і мяса кідалі ў гаршчок, страву прыкрывалі капусным лісцем, а зверху клалі кавалак дзёрну ці накрыўку, калі яна была. Гаршчок з бакоў абкладвалі гарачым вуголлем і чакалі, пакуль страва згатуецца. Хутка страва стала папулярнай і яе пачалі гатаваць дома ў печках.
У ХІХ стагоддзі ў «пастухоўскі гаршчочак» пачалі дадаваць бульбу, акурат у тыя часы яна становіцца папулярнай гароднінай у беларусаў.
Як прыгатаваць «пастухоўскі гаршчочак»?
Пачышчаную моркву, бульбу і цыбулю трэба парэзаць кубікамі, наразайце не надта буйнымі кавалкамі гародніну, каб у лыжку траплялі ўсе інгрэдыенты стравы — так смачней. Вэнджанае сала — таксама кубікамі, падсушаную каўбасу — кольцамі, часнок — пласцінкамі. Калі вы не ўжываеце мяса, то можна замяніць яго грыбамі. Будзе таксама смачна.
На дно гаршчочка выкласці сала, з яго вытапіцца тлушч і страва не прыгарыць. Далей усё можна выкладваць адвольна, соль і перац дадаецца па смаку. Таксама дадайце крышку вады, каб страва лепш пратушылася і была сакавітай. Зверху кладзецца капусны ліст, а потым гаршчок закрываецца накрыўкай. У духоўку ці печ ставім гаршчок на гадзіну пры тэмпературы 180 градусаў.
Капусны ліст хутчэй за ўсё крыху прыгарыць, таму яго выдаляем. Падаваць страву можна як у гаршчочку, так і на талерцы. Пасечаная зеляніна не будзе залішняй, яна надасць страве свежы водар, а есці гарачую страву смачней з лыжкай смятаны.
Смачна есці!
Нам спатрэбяцца на 4 порцыі:
Бульба — 400 грамаў
Морква — 200 грамаў
Цыбуля — 200 грамаў
Сала і каўбаса — па 200 грамаў
Адзін капусны ліст
Соль і перац — па смаку
Калі вам падабаюцца нашыя відэапраекты і аўтарскія артыкулы, вы можаце падтрымаць рэдакцыю «Будзьмы», набыўшы нам кубачак кавы. Гэта дапаможа нам стварыць больш цікавых відэаролікаў і арыгінальных артыкулаў