З гэтага навучальнага года дзевяцікласнікі будуць здаваць чатыры экзамены, а не тры, як некалькі гадоў да гэтага — у экзаменацыйную праграму вяртаецца гісторыя Беларусі, паведамляе Sputnik.
Выніковыя іспыты для дзевяцікласнікаў устаноўлены па чатырох прадметах: беларускай і рускай мовах, матэматыцы і гісторыі Беларусі, якая вярнулася ў экзаменацыйную праграму за базавую школу праз восем гадоў.
З новаўвядзенняў — цяпер навучэнцы будуць здаваць рускую і беларускую мовы ў фармаце пераказу, а не дыктанта, як раней. Для гэтага на экзамен адвядуць больш часу.
Матэматыка, як і раней, пройдзе ў фармаце кантрольнай работы ў пісьмовай форме. Канцэпцыя экзамену па гісторыі Беларусі таксама не зведала змен — гэта па-ранейшаму вуснае выпрабаванне з пытаннямі ў білетах.
Экзамены ў 9 класах правядуць з 1 па 9 чэрвеня, пераздаць іх можна будзе з 21 па 25 жніўня наступнага года.
Нагадаем, гэтыя змяненні прадугледжаны новым Кодэксам аб адукацыі, частка норм якога ўступіла ў сілу з 1 студзеня 2023 года.
ЦЭ у 11 класе
У сваю чаргу 11-класнікі — і гэта ўжо зусім не навіна — будуць здаваць два цэнтралізаваныя экзамены. Яны заменяць выпускныя экзамены па рускай або беларускай мове і другім прадмеце на выбар з пераліку дысцыплін, па якіх праводзіцца ЦТ.
Вядома, што першы цэнтралізаваны экзамен па мовах пройдзе 14 мая 2023 года, здача другога адбудзецца 21 мая. Да гэтага моманту навучальны год у школах будзе завершаны. Самі экзамены адбудуцца ў нядзелю.
Рэзервовыя дні ЦЭ — з 23 па 25 мая і з 21 па 23 жніўня. Таксама ў Беларусі правядуць рэпетыцыю цэнтралізаванага экзамену, яна пройдзе 28 студзеня.
Тэсты для правядзення экзамену распрацоўвае РІКВ, заданні будуць прадстаўлены на базавым узроўні. Маштабная рэпетыцыя ЦЭ пройдзе ва ўсіх школах 28 студзеня.
Раней стала вядома, што навучэнцаў, якія маюць гадавыя адзнакі ніжэй за тры балы, не будуць дапускаць да здачы цэнтралізаванага экзамену.
