28 ліпеня прыхільніца сучаснай беларускай літаратуры Алена сустрэлася з папулярным пісьменнікам-даўншыфтарам.
Хоць сам Андрусь сказаў, што не вельмі любіць называць сябе гэтым модным словам. Тым не менш спадарыня Алена, якая прайшла тэкст па кнiзе “Радзіва Прудок” на сайце movabox.by і выйграла сустрэчу з яе аўтарам, падрабязна распытвала пра “эміграцыю” з Мінска ў вёску.
Пераможца чацвёртага этапу MOVABOX працуе дэкаратарам. Спадарыня Алена лічыць сябе абсалютна гарадскім жыхаром. Для яе феномен, што чалавек можа вось так проста пераехаць у вёску, ды яшчэ праўдзіва пісаць пра тамтэйшыя норавы і жыццё, у якім, як ні дзіўна, можна пазнаць сябе.
— Андрусь, ну вось як ты пішаш? — не пераставала здзіўляцца Алена.
— Ну, вось полеш кабачкі, а ў галаве самі радкі складаюцца. Пасля канструкцыя настолькі пачынае ціснуць, што кідаеш усё і бяжыш запісваць, пакуль не забыў, — кажа Андрусь Горват.
Пісьменнік падзяліўся, што шкадуе пра тое, што ягоны акаўнт у Фэйсбуку страціў камернасць: часам што-небудзь апублікуеш, а праз 10 хвілін тэлефануе Уладзімір Арлоў, каб абмеркаваць, альбо напісанае наўпрост трапляе ў “Нашу Ніву”. Андрусь прызнаўся, што зусім не меў намеру рабіцца аж настолькі публічнай персонай. Яму вельмі камфортна ў сябе на хутары, бо па натуры ён інтраверт.
Спадарыня Алена распавяла, што таксама хацела б набыць дом, аднак мае страх перад невядомым вясковым ладам жыцця. Андрусь Горват заўважыў, што ён сам гуманітарый, а казу навучыўся даіць увогуле па Ютубе, так што няма чаго баяцца новых для сябе заняткаў.
Падпісваючы кнігу на памяць, Андрусь Горват намаляваў ката. Паколькі ў спн. Алены “Радзіва Прудок” ужо ёсць, яна папрасіла аўтограф для сваёй мамы.
А што ж было ў традыцыйным MOVABOX? Насенне касмеі, варэнне з цыбулi, прабірка з пахамі вясковага шчасця, плітка шакаладу, маленькія драўляныя дзэн-граблі, керамічная кружка і свістулька-каза з гліны — усё, што неабходна для простага чалавечага натхнення.
Такую скрынку з падарункамі разам са спадарыняй Аленай атрымалі 20 шчасліўчыкаў, якія адказалі на пытанні конкурсу MOVABOX, арганізаванага кампаніяй velcom.
Хрысціна Марчук