Галоўнае, што адрознівае фрылансера і класічнага супрацоўніка, – магчымасць самому распараджацца сваім часам і абіраць сабе месца для працы. Але далёка не кожны “вольны рыцар” хоча працаваць толькі дома. Дык дзе можна і справай заняцца, і нядорага папіць кавы?

Мы запускаем цыкл артыкулаў пра месцы, дзе фрылансер можа спакойна і камфортна заняцца сваёй працай і пры гэтым не патраціць вялікую суму грошай.

Спачатку пра крытэры і ўмовы. На нашу думку, каб пэўнае месца назваць freelance-friendly, трэба:

1. Месцазнаходжанне. Гэтае месца мусіць быць блізка ад метро і/ці каля асноўных прыпынкаў іншага транспарту. Неабходна, каб была магчымасць лёгка дабрацца і хутка трапіць у іншае месца горада.
2. Wi-Fi. Вядома, што для нармальнай працы нельга хвалявацца пра трафік і сеціва. Таму ў такім месцы бясплатны інтэрнэт must have.
3. Разеткі. Мы жывём у ХХІ стагоддзі, дзе галоўным рэсурсам стала электрычнасць. У freelance-friendly месцы наведнік не павінен хвалявацца пра зарад батарэі сваіх гаджэтаў.
4. Кава/гарбата. Працаваць трэба з задавальненнем, таму кубак гарачай кавы і гарбаты – таксама важная ўмова шчасця фрылансера. І тут чым большы выбар – тым лепш.
5. Цэны. Які б заробак у фрылансера ні быў, грошы мы ўсе лічым. Таму цэны павінныя быць не вышэйшыя за сярэднія, інакш ты будзеш 100 разоў думаць, ці захочаш туды ездзіць калі не кожны дзень, то пару разоў на тыдзень. Лепш ужо дома пасядзець ці пашукаць нешта выгаднейшае.
6. Атмасфера і інтэр’ер. Мы ўсе маем патрэбу ў эстэтыцы, таму добрая абстаноўка і музыка толькі паспрыяе працаздольнасці і задавальненню ад працэсу.
7. Прыбіральня. Працаваць можна і некалькі гадзін, таму гэта таксама вельмі важная ўмова.
8. Час працы. Наколькі рана туды ўжо можна завітаць ці наколькі доўга там можна завіснуць? Тут працуе прынцып “чым больш, тым лепш”, бо натхненне ці патрэба папрацаваць можа наступіць у любы час дня.

І галоўная ўмова нашых аглядаў – пэўная аб’ектыўнасць. Мы пішам пра сапраўды добрыя месцы, а калі нешта кульгае – то пішам пра гэта. Нашы артыкулы – не рэкламныя тэксты.

З уводзінамі скончылі, таму пераходзім да нашага першага героя – Wake up!

Wake up cafe

 Сённяшні дэсант прыпадае на вечар. На дварэ вільготна і даволі прахалодна, таму цёплая кава ці гарбата будуць у тэму. Ды і трэба зрабіць кавалак працы, таму трэба хутчэй знайсці прыемнае месца, каб крыху расслабіцца і прысвяціць свой час працы. Гэтая думка прыйшла ў галаву на плошчы Якуба Коласа, а ніякага жадання далёка ехаць няма. Крыху прайшоўшыся ў бок Камароўкі, мы пабачылі прыгожыя гірлянды і надпіс “Wake up cafe”. Чаму б і не? Давайце зойдзем!

 Месцазнаходжанне

Як мы ўжо напісалі ў тызеры, кавярня месціцца ў раёне плошчы Якуба Коласа каля гандлёвага цэнтра “Сілуэт”. Вельмі зручна, бо адсюль даволі лёгка дабрацца ў большасць частак горада. І самае галоўнае – кавярня знаходзіцца з боку галоўнай дарогі, таму доўга шукаць не давядзецца.

Таму за першы пункт ставім кубак кавы.

Кава/гарбата

Распрануўшыся, можна паглядзець і на меню. Тут выбар даволі добры. Меню напояў дзеліцца на стандартнае і сезоннае. Ужо халодна, таму ў другім пункце кавярня прапаноўвае шэраг цёплых напояў. З пастаяннага меню:

• Амерыкана
• Капучына
• Эспрэса
• Латэ
• Флэт-уайт
• Какава
• Шакаладнае малако

Збольшага ў кожнага з іх ёсць тры памеры: малы, стандартны і вялікі.

Таксама тут можна знайсці раф-каву, гарбату, мока, малочны кактэйль і іншае. З “цёплага” меню ёсць як фірмовы напой “Wake up”, так і больш знаёмая імбірная гарбата з масалай. Меню вялікае, таму кожны зможа для сябе нешта знайсці. Асабіста я ўзяў капучына, на якім мне зрабілі прыгожы малюнак пяра – сімвалічна, аднак, з улікам таго, што ніхто з персаналу не ведае пра мае намеры.

Для асаблівых гурманаў тут багата торцікаў, батончыкаў і рознага іншага смакоцця. Але цэны на гэта традыцыйна высокія. У любым разе, мы прыйшлі працаваць, а не есці торцікі.

Таму за гэты пункт таксама кубак кавы.

Цэны

 Па цэнах тут даволі танна: напоі ў дыяпазоне 2,2 – 6 рублёў у залежнасці ад памеру кубка і самога напою. Звычайнае амерыкана абыдзецца ў 2,2 ці 3,1 рубля за малы і стандартны памер адпаведна.

Таму за цэны таксама кубак кавы.

Разеткі

Яны тут ёсць амаль каля кожнага століка, таму месца, куды можна ўставіць зарадку, знойдзецца. А дадатковы плюс у тым, што тут звычайна не адна разетка на столік, а ажно 3, таму атрымаецца зарадзіць і ноўтбук, і тэлефон, і планшэт, калі ён у вас ёсць.

Такая разеткавая шчодрасць заслугоўвае яшчэ аднаго кубка кавы.

WI-FI

Ён тут ёсць. Пароль можна даведацца ў барысты. Праблем з падключэннем і пінгам не сустрэў. А хуткасць мясцовага сеціва вы можаце пабачыць самі.

За стабільнасць, наяўнасць і хуткасць кубак кавы гэтаму месцу!

Прыбіральня

Ёсць. Адзінае але – яна аднамесная, таму існуе імавернасць, што давядзецца крыху пачакаць. Але і сама кавярня не надта вялікая, таму наўрад ці тут будуць велізарныя чэргі.

Кубак кавы за наяўнасць.

Час працы

Даволі стандартны, але камфортны – з 09.00 да 23.00 без выходных. Нібы час аптымальны, але… Патрэба тэрмінова сесці працаваць можа наступіць як самым ранкам, так і да закрыцця метро.

Не кругласутачна, таму палова кубка кавы.

Атмасфера і інтэр’ер

Падчас майго візіту я не пачуў ніякай папсы. Лёгкія прыемныя матывы старой класікі ў стылі блюзу, джазу ці нечага больш папулярнага. У кожнага свой густ, але мне ўсё прыйшлося даспадобы. І самае галоўнае – гучнасць у межах камфорту.

Наконт атмасферы і інтэр’еру. Кавярня нібы падзеленая на два сектары. Першы – калідор у асноўную залу. Тут усяго тры столікі, але яны адзін ад аднаго агароджаныя, што дае магчымасць крышку схавацца ад астатняга свету і прысвяціць свой час выключна працы. Асноўная зала ўжо агульная. Тут ёсць дзве мінібарныя стойкі, а астатняе – тыя ж столікі. Усё прыемна, ненавязліва. Крышку нагадвае амерыканскі стыль, бо ў інтэр’еры вельмі шмат дрэва. Карацей, тут лямпава, а ў сукупнасці з музыкай дык увогуле вельмі прыемна.

Адзін з рэдкіх выпадкаў, калі атмасфера і інтэр’ер сапраўды не выклікаюць нараканняў. Таму адназначна кубак кавы.

Забіць нельга памілаваць. Ставім канчатковую коску

Па шчырасці, адно з рэдкіх месцаў, дзе сапраўды ўсё ёсць для добрага працоўнага настрою. Прыемна, а з іншага боку, няма жадання поўнасцю расслабіцца ці заснуць. Тое, што месца ў цэнтры, амаль каля метро і іншага транспарту, – таксама вялікі плюс. А астатняе ўсё ёсць: нармальны асартымент, сярэднія цэны, наяўнасць добрага сеціва і разетак. Карацей, рэкамендуем для працы, фрылансер!

7,5/8 кубкаў кавы

Freelance-friendly, але не для вельмі ранніх і позніх рыцараў.

Багдан Сакалоў, budzma.org