Алесь Тодараў на budzma.org распавядае пра самыя простыя рэчы, якія дазволяць вам пражыць любы дзень насычана.
Мы жывем у такі час, калі кожны дзень нагадвае прамінулы. І ў гэтай будзённасці часцяком губляецца прадуктыўнасць. Прывыкшыя да пэўнай аднастайнасці мы часцяком хочам займацца не тым, што трэба, а тым, што прыносіць эмоцыі.
Вось некалькі простых правілаў, якія абавязкова зробяць ваш дзень насычаным і прадуктыўным:
1. Пачніце планаваць
Складаць план дня лепей загадзя: або напярэдадні ўвечары, або раніцай. Гэта неабходна для таго, каб у выпадку чаго можна было ўнесці карэктывы.
Складзіце спіс спраў, якія трэба выканаць цягам дня. Уключыце дробныя справы і буйныя.
Заплануйце выкананне спраў на пэўны час. Пакідайце запас на выпадак непрадбачанага.
Не плануйце шмат спраў на адзін дзень. Плануйце 1-3 важныя справы, якія трэба выканаць у любым выпадку. А астатнія, калі паспееце.
Размяркоўвайце справы на тыдзень раўнамерна, каб не было перакосаў.
2. Пазбаўцеся ад інфармацыйнага шуму
Смела адкідайце ўсё лішняе!
Чытайце толькі правераныя крыніцы інфармацыі, але і да іх стаўцеся крытычна. Не ўвязвайцеся ў сеціўныя ці афлайнавыя спрэчкі, якія не прынясуць вам нічога, нават калі вы выйдзеце з іх пераможцам. Заўтра ўсе забудуць пра іх, бо з’явіцца новая нагода для абмеркавання.
Канцэнтруйце сваю ўвагу толькі на тым, што сапраўды мае для вас значэнне!
3. Арганізуйце сабе працоўнае месца
Вам павінна быць камфортна за вашым працоўным месцам. Яно павінна быць чыстым і прыбраным. Калі вакол вас хаос, то з гэтага нічога добрага не народзіцца. Варта прыбірацца хаця б раз на тыдзень і парадкаваць усё такім чынам, каб нічога потым не шукаць. Усё неабходнае для працы павінна быць пад рукой, каб не выдаткоўваць час на пошукі ў выпадку неабходнасці.
4. Займайцеся спортам
Імкніцеся да таго, каб цягам дня рабіць хаця б нейкія фізічныя практыкаванні, асабліва, калі шмат часу праводзіце за кампутарам. Калі працуеце з дома, то можаце рабіць некалькі падыходаў цягам працоўнага дня.
Калі маеце вольны час, то можаце запісацца ў басейн або трэнажорную залю. Лепшы варыянт — разам з трэнерам падабраць для сябе аптымальную праграму для трэніровак.
Спорт — гэта тая рэч, якая вучыць непрыемныя рэчы ўспрымаць з прыемнасцю. Будзе карысна не толькі для фізічнага развіцця, але і для любога віда дзейнасці.
5. Знайдзіце час для творчасці
Згадайце і задумайцеся над тым, кім вы хацелі быць у дзяцінстве? Мастаком? Акторкай? А можа быць, паэтам?
Знайдзіце хаця б пяць-дзесяць хвілін цягам дня, каб заняцца творчасцю. Гэта можа быць што заўгодна: малюйце, пішыце вершы або прозу, спявайце, рабіце прыгожыя фотаздымкі і гэтак далей. Галоўнае, рабіце гэта самі.
Творчасць прыўнясе ў вашае паўсядзённае жыццё яскравасць. Вы і самі не заваўважыце, як вас пацягне часцей займацца абранай справай.
Зрэшты, а хто ведае, можа, такім чынам менавіта вы папоўніце шэрагі класікаў беларускай літаратуры? У гэтым жыцці рознае бывае!
6. Праветрывайце памяшканне
З улікам таго, што многія цяпер працуюць з дому, не варта забывацца на свежае паветра. Праветрываць пакой варта як мінімум тры разы на дзень:
— ранкам, калі прачнуліся, каб пазбавіцца застаялага паветра.
— удзень, найперш тыя памяшканні, дзе знаходзяцца людзі.
— увечары, за паўгадзіны да сну.
Банальная адсутнасць свежага паветра можа стаць прычынай нізкай прадуктыўнасці. Пры недахопе кіслароду абвастраюцца хваробы, пачынае балець галава, з’яўляецца стомленасць і млявасць.
7.«Рэжымце»
Для таго, каб жыць максімальна доўга і максімальна камфортна, не маючы набору хранічных хваробаў, варта як мінімум імкнуцца да ваканання рэжыму дня.
Гэта не абавязкова мусіць быць той самы рэжым, якога вы трымаліся ў школе. Вы можаце самі яго падладзіць пад сябе цяперашняга, каб ён цалкам адпавядаў вашым сённяшнім надзённым патрэбам. Але ў любым разе будзе лепей, калі вы будзеце жыць паводле нейкай уласнай завядзёнкі, чым залежаць ад абставінаў. То бок класціся спаць не калі трэба, а калі атрымалася, і прачынацца гэтаксама — за пятнаццаць хвілін да выхаду з дому.
Спарадкаванасць прывучае да адказнасці, а гэта і ёсць сапраўдная свабода.
Поспехаў!
Алесь Тодараў, budzma.org
