Драматычная камедыя «Крышталь», якая ўжо зрабілася хітом міжнародных кінафестываляў і атрымала станоўчыя водгукі замежнай прэсы, выходзіць у шырокі мінскі пракат. 29 жніўня ў кінатэатры «Масква» адбудзецца прэм’ера дэбютнага поўнаметражнага фільма Дар’і Жук. Білеты даступныя на сайце ByCard і ў касах кінатэатра.
Дзеянне фільма адбываецца ў 90-я гады ў Беларусі. Праз памылку друку ў падробленай анкеце на амерыканскую візу маладая дзяўчына-дыджэй аказваецца ў заводскім гарадку Крыштальны. Там яна збіраецца любой цаной дамагчыся ўвасаблення сваёй «амерыканскай мары».
«Сюжэт «Крышталю» разгортваецца ў сярэдзіне 90-х, бо гэта час, які я добра ведаю з асабістага досведу. Мая пратаганістка Веля – дыджэй, якая марыць паехаць у Чыкага, каб наведаць калыску хаўса. Мы сустракаем яе ў адной з гэтых чэргаў у амбасаду. Яна маладая і поўная ілюзій, яна ўсё яшчэ адчувае сябе цэнтрам свайго свету. Яна – архетып амерыканца, які захрас у постсавецкім беспарадку. Свабода, якую яна шукае, недаступная, і ў той рэальнасці, у якой яна жыве, індывідуалізм не заўсёды перамагае. Кожны крок яе прыгоды пастаянна кідае выклік яе перакананням і падыходу да жыцця», – распавядае пра фільм рэжысёрка.
На прэм’еры ў Беларусі карціну прадставяць рэжысёрка Дар’я Жук, акторы фільма, удзельнікі здымачнай групы. Пасля паказу ў «Маскве» стваральнікі адкажуць на пытанні гледачоў.
Сусветная прэм’ера фільма адбылася ў чэрвені гэтага года на прэстыжным міжнародным кінафестывалі ў Карлавых Варах, дзе карціна адкрыла конкурсную секцыю «На Усход ад Захаду». У ліпені «Крышталь» атрымаў Гран-пры на міжнародным кінафестывалі ў Адэсе. Акрамя таго, фільм запрошаны на больш чым 20 кінафестываляў па ўсім свеце. Станоўчыя водгукі пра карціну напісалі выданні Hollywood Reporter, Screen International, Variety, «Камерсант» і многія іншыя.
Перадпрэм’ерны паказ фільма з удзелам рэжысёркі пройдзе 27 жніўня ў кінатэатры Falcon Club Буцік Кіно. З 30 жніўня фільм можна будзе паглядзець у кінатэатрах «Аўрора», «Піянер», «Беларусь», «Мір», «Ракета», «Кіеў», Falcon Club Буцік Кіно, Silver Screen і «Арт-кінатэатр».
Пракат фільма ажыццяўляецца Цэнтрам візуальных і выканальніцкіх мастацтваў «АРТ Карпарэйшн» у рамках праекта «Лістапад. Калекцыя». Генеральны партнёр пракату ў Беларусі – EPAM Systems.
