14 чэрвеня 2018 года а 18-й гадзіне ў Нацыянальным мастацкім музеі Рэспублікі Беларусь (зала старажытнабеларускага мастацтва) адбудзецца прэзентацыя кнігі дэкана архітэктурнага факультэта БНТУ, доктара архітэктуры, прафесара Сардарава Армена Сяргеевіча «Летапіс памяці пакаленняў: мемарыяльная архітэктура Беларусі».
Мемарыяльная архітэктура ўвекавечвае памяць пра людзей, вераванні, знамянальныя падзеі і месцы. Яна на працягу многіх стагоддзяў уплывала і працягвае сёння аказваць уплыў на духоўную культуру, маральнае, ідэйна-рэлігійнае развіццё і светапогляд людзей.
Ад язычніцкіх, пазней «ахрышчаных» камянёў і свяцілішчаў, пахавальных курганоў-“валатовак” да мемарыяльных комплексаў ХХ–ХХI стагоддзяў беларускі народ ствараў сваю асаблівую гісторыю чалавечага духу на зямлі, у камені, дрэве, цэгле.
Кніга распавядае пра шматвяковыя традыцыі мемарыяльнай архітэктуры Беларусі ў тэкстах і ілюстрацыях, якіх больш за 200. У кнізе прадстаўлены помнікі, што знаходзяцца больш чым у 60 малых населеных пунктах нашай краіны, таму яна прысвячаецца «Году малой Радзімы».
Прэзентацыя кнігі суправаджаецца адкрыццём фотавыставы.
Паводле прэс-рэлізу