Трэці эпізод лялечнага відэаспектакля «Прыгоды мышак» ужо даступны для прагляду на дзіцячым ютуб-канале «Будзьма дзецям».
Увосень хатняя мышка Даша запрасіла сваю сяброўку мышку Машу да сябе ў госці ў дом на хутары. Разам з палявымі мышаняткамі Алесікам і Зоськай яны ласаваліся шакаладам і весела танчылі. Але раптам Маша спынілася і насцярожана пачала нюхаць паветра...
Што здарылася далей, даведаецеся, паглядзеўшы спектакль.
Акрамя непасрэдна прагляду, мы прапануем іншыя цікавыя і карысныя актыўнасці, якія можна рабіць паводле спектакля. Вось, напрыклад:
1. Можна разам патанчыць з мышкамі Дашай і Машай, бо сяброўкі-мышкі вельмі любяць танчыць, і робяць яны гэта пад выдатную музыку ад гурта «Стары Ольса».
2. Лепш за ўсё паглядзець спетакль усёй сям’ёй, а потым разам з дзеткамі абмеркаваць, што яны пабачылі. Калі дзеткі яшчэ маленькія і ім складана будаваць доўгія сказы, дапамажыце ім, прапанаваўшы варыянты адказаў.
3. Папрасіце дзяцей намаляваць мышак Дашу і Машу і домікі, у якіх яны жывуць.
4. Са старэйшымі дзеткамі можна зладзіць свой спектакль па матывах «Прыгодаў мышак». Можна выкарыстаць для спектакля мяккія цацкі, а можна пашыць мышак з фетру. Выкрайкі для такіх цацак лёгка знайсці ў інтэрнэце. Для дэкарацый скарыстайцеся каляровай паперай ды прыроднымі матэрыяламі (падыдуць лісцікі, галінкі, шышкі — усё, што знойдзецца пад рукой). Задавальненне ад сумеснай творчасці вы гарантавана атрымаеце!
5. Натхніўшыся спектаклем, разам з дзецьмі прыдумайце сваю казачную гісторыю.
Дасылайце нам свае казкі і малюнкі на электронную пошту razam@budzma.org. Самыя цікавыя мы апублікуем на нашым сайце budzma.org.
