Гурт Sciana прадстаўляе на сайтах Budzma.org і Tuzin.fm свой альбом “Мы застаемся” — трэці нумарны дыск за сваю 14-гадовую гісторыю.
У назьве новага альбому берасьцейцаў закладзена іх пазыцыя — яны застаюцца тут і цяпер, з сваёй музыкай і мовай. Рук не апускаюць, у чужую краіну не зьязджаюць ды працягваюць ствараць новыя песьні, хутчэй насуперак, чым дзякуючы абставінам.
Спампаваць з Tuzin.fm адным файлам
Неяк так склалася, што рок-гурты, што ўтварыліся пры канцы 90-х, у нас чамусьці дагэтуль лічацца “маладымі ды таленавітымі” (найперш IQ48, Sciana, Re1ikt). Між тым, у гэтых музыкаў даўно сфармаваная музычная і жыцьцёвая філязофія, і яны абсалютна заслужылі да сябе адпаведнага стаўленьня. Як, скажам, маладыя фолк-музыкі прымаюць “Старога Ольсу” (абсалютных пагодкаў “Сьцяны”, між іншым) — яны “бацькі”. Sciana — адзін з тых гуртоў, што сфармаваў аблічча беларускай альтэрнатыўнай музыкі новага стагодзьдзя. Яны маюць актуальны гук, шалёную энэргетыку, абсалютна пісьменныя тэксты ды аранжыроўкі.
Дыск “Мы застанемся” збольшага складзены зь нятленак, правераных гадамі на выступах у тутэйшых клюбах ды пабах ды замежных канцэртных залях ды опэн-эйрах. “Сьцяноўцы” наогул да выданьня рэлізаў падыходзяць зь нейкім асаблівым трапятаньнем, таму і выходзяць у іх альбомы гады ў рады: дэбютнік “Рыфы лёсаў” быў у 2002, а наступны, “Кропка вяртаньня”, толькі ў 2010. У новы дыск увайшлі дагэтуль нявыдадзеныя гіты “Make Yourself” (больш вядомая, як “Можна быць”) ды “Калыханка”, праўда, ужо без саксафона. Музыкі вымушана адмовіліся ад гэтага інструмэнта, бо саксафаніст іхні лёзунг не падзяляў і заставацца ў гурце бяз яўных пэрспектываў не хацеў. Замена жывога інструмэнта электронікай выглядала на рызыкоўную, але апраўдала сябе — асабліва цікавы сымбіёз атрымаўся ў песеньцы “Ліхтары”. Песьню “Вясна.by” наогул аддалі на апрацоўку новаму ўдзельніку каманды Валерыю Сакалову, вядомаму з электронных праектаў Too late: Frozen i SKLF, і ён зьмяніў твор да поўнай непазнавальнасьці. Альбом дарыць некалькі новых гітоў — найперш “Апошнюю песьню”, запісаную ў дуэце з Касяй Леванюк з гурта TerraKod, фактычна, загалоўны нумар альбому. А трэкам “Рагамабіль” каманда руйнуе стэрэатып пра тое, што грае выключна суворую музыку з экзыстэнцыйнымі тэкстамі.
Sciana зрабіла практычна немагчымае — яна запісала альбом, яшчэ цікавейшы за папярэдні, які і палаяць не было за што. Яны “бацькі”, гэта факт.
Ідэя: 10
Выкананьне: 10
Тэксты: 9
Запіс: 9
Аздабленьне: 8
Сяргей Будкін
