У Мураванцы Шчучынскага раёна вакол царквы Раства Багародзіцы больш няма старых дрэваў. Выпадак — частка агульнай тэндэнцыі, піша hrodna.life са спасылкай на старонку ў Фэйсбук Сяргея Плыткевіча.
Царква ў Мураванцы
«Каля Мураванкаўскай царквы-крэпасці больш няма векавых дрэваў», — напісаў Сяргей Плыткевіч.
Фота са старонкі Facebook Сяргея Плыткевіча
Некалькі чалавек у каментарах да допісу адзначылі, што частку дрэваў пашкодзіў ураган, таму іх спілавалі. Але дрэваў не было ўжо ў студзені 2024 года, адзначыў адзін з каментатараў.
Скрыншот відэа з TikTok, студзень 2024 г.
Мураваны плот вакол царквы імкнуцца завершыць да 1 кастрычніка — святкавання 500-годдзя храма. Новыя дрэвы вакол храма саджаць не плануюць.
Каменны плот вакол царквы. Фота з каментароў Facebook
Працы па аднаўленні царквы Раства Багародзіцы ў Мураванцы пачалі восенню 2022 года. Гэта адзін з нямногіх у Беларусі аб’ектаў, уключаных у папярэдні спіс Сусветнай спадчыны ЮНЕСКА.
Знішчэнне дрэваў — тэндэнцыя часу
Многія каментатары допіса пра Мураванку адзначылі тэндэнцыю да спілоўвання дрэваў на могілках і каля рэлігійных пабудоў у розных частках Беларусі. У прыклад прыводзілі знішчаныя дрэвы каля касцёла Святога Іосіфа ў вёсцы Рубяжэвічы Стаўбцоўскага раёна, касцёл Святога Казіміра ва Уселюбе.
Усе дрэвы, у тым ліку жывую 300-гадовую сасну, якой хацелі надаць статус помніка прыроды, вясной 2024 года спілавалі на могілках вёскі Навасёлкі-2 Лідскага раёна. Шырокі розгалас атрымала знішчэнне здаровых 300-гадовых дубоў у аграгарадку Ахова пад Пінскам. Дырэктара мясцовага Дома культуры, які спрабаваў уступіцца за дрэвы, арыштавалі на 15 сутак.
«Живу в соседней Литве и тут вековые деревья всячески оберегают, подвязывают тросами, чтобы непогода не поломала, защищают ствол рейками и т. д. И только в РБ приходит запросто дядя с пилой и срезает все. В жилых дворах пеньки, вокруг памятников пустота. И такая же пустота внутри людей, кто это делает», — напісаў адзін з каментатараў. У Чэхіі таксама ашчадна ставяцца да дрэваў, адзначыў іншы.
Чытайце яшчэ:
