Міжнародны фонд развіцця адукацыі дарослых (IFAE) запрашае спрычыніцца да станаўлення новай адукацыйнай пляцоўкі, падзяліцца сваімі ведамі і ўменнямі са сталымі беларусамі, якія жывуць зараз у Польшчы, і далучыцца да каманды адукатараў Беларускага Універсітэту Залатога Веку ў Польшчы.

Сёння ў Польшчы жыве некалькі тысяч беларусаў ва узросце 55+. Большасць гэтых людзей мае патрэбу ў падтрымцы, у супольнасці «сваіх» людзей, хоча надалей адчуваць сябе патрэбнымі, развівацца, падтрымліваць сваё фізічнае і псіхалагічнае здароўе.

Менавіта таму быў створаны Універсітэт Залатога Веку.

«Мы пачынаем гэтую працу на валанцёрскіх падмурках і разлічваем на добрую волю і сілы людзей, якія выказалі жаданне ўвайсці ў нашую арганізатарскую каманду, на дапамогу з боку мясцовых беларускіх і польскіх грамадскіх ініцыятыў і іншых інстытуцый», — адзначаюць стваральнікі Беларускага Універсітэту Залатога Веку ў Польшчы.

Калі і дзе будуць праходзіць заняткі УЗВ?

Заняткі Беларускага Універсітэту Залатога Веку распачнуцца ў сярэдзіне студзеня 2026 года і будуць доўжыцца да канца красавіка адразу на чатырох пляцоўках: у Беластоку, Варшаве, Вроцлаве і Гданьску.

Заняткі будуць праходзіць ў названых вышэй гарадах у фармаце афлайн. Працягласць кожнага занятку — 1 −1,5 гадзіны.

Каго шукае УЗВ?

Запрашаюцца да супрацы адукатары, якія гатовыя прапанаваць заняткі на самую розную тэматыку: гісторыя і культура Беларусі, польская мова і культура, медыяпісьменнасць, здароўе, псіхалогія, магчымасці сацыяльнай, прававой і іншай падтрымкі і г.д.

Вы можаце заявіць:

• Аднаразовы занятак (лекцыя, майстар-клас, дыскусія і г.д.)
• Кароткатэрміновы курс з 3-4 заняткаў на канкрэтную тэму
• Доўгатэрміновы курс з 5-8 заняткаў на канкрэтную тэму.

Падаць заяўку можна да 8 кастрычніка, запоўніўшы форму па спасылцы.

Што будзе адбывацца пасля таго, як вы запоўніце форму заяўкі?

Да 15 кастрычніка каманда УЗВ адбярэ самыя цікавыя прапановы і распачне камунікацыю з іх аўтарамі, каб удакладніць тэму, плануемыя вынікі заняткаў, метады навучання і г.д.

Пры адборы тэмаў каманда УЗВ будзе арыентавацца на найбольш запатрабаваныя сталымі людзьмі тэмы заняткаў, якія выявіла зробленае камандай у траўні-чэрвені бягучага года даследаванне. Пры гэтым каманда УЗВ вітае заяўкі на правядзенне заняткаў па іншых цікавых тэмах!

На аснове гэтай працы у лістападзе будуць падрыхтаваныя публічныя анонсы заняткаў.

Менавіта на гэтыя анонсы будуць арыентавацца будучыя студэнты УЗВ, запісваючыся ў снежні на той альбо іншы курс.

Заняткі і курсы, на якія запішацца 8 і больш чалавек, будуць уключаныя ў расклад заняткаў у тым альбо іншым горадзе.

На якіх умовах будуць працаваць выкладчыкі?

Праца Беларускага УЗВ распачынаецца на валанцёрскай аснове. Першы сезон (студзень-красавік, 2026) мае эксперыментальны характар, каб упэўніцца ў тым, што задума запатрабаваная, што ёсць дастатковая колькасць людзей, гатовых «укладацца» у яе.

Таму зараз запрашаюцца выкладчыкі, гатовыя працаваць па-валанцёрску. Адпаведна, з усімі выкладчыкамі будзе заключана пагадненне аб валанцёрскай працы.

Чаму УЗВ?

Ініцыятарамі стварэння Беларускага УЗВ у Польшчы з’яўляецца каманда Міжнароднага фонда развіцця адукацыі дарослых (ifae.live).

Каманда Міжнароднага фонда развіцця адукацыі дарослых больш за 15 год працавала для развіцця першага беларускага «Універсітэту Залатога Веку» у Гародні.

«Мы ведаем, якімі прынцыпамі і каштоўнасцямі кіравацца, ведаем, як з нуля стварыць месца, якое будзе дапамагаць жыць актыўна і быць запатрабаванымі, ведаем, як пісьменна працаваць са сталымі людзьмі — каб ім было бяспечна, цікава і карысна.

Мы ведаем, як цяжка адаптавацца ў новай краіне, як складана здабыць сяброў і прыязнае атачэнне, як складана інтэгравацца ў розныя супольнасці. Мы хочам, каб у сталых беларусаў, якія перажываюць шмат стрэсу, з’явілася падтрымліваючае асяроддзе.

Менавіта таму мы хочам стварыць прыязныя для сталых людзей пляцоўкі ў Польшчы, дзе яны знойдуць увагу, цеплыню, новыя веды і спрыяльнае асяроддзе».

Што ўжо зроблена для станаўлення УЗВ у Польшчы?

Дзякуючы дафінансаванню Polsko-Amerykańskiej Fundacji Wolności у межах праграмы RITA — Przemiany w regionie, якую рэалізуе Fundacja Edukacja dla Demokracji, праведзены даследаванне адукацыйных патрэбаў сталых беларусаў у Польшчы, сустрэчы са сталымі людзьмі і патэнцыйнымі адукатарамі ў Беластоку, Варшаве, Вроцлаве і Гданьску.

У жніўні актывісты ініцыятыўных груп з гэтых гарадоў сабраліся на Акадэмію лідэраў УЗВ, дзе знаёміліся з польскім досведам, планавалі розныя аспекты арганізацыі працы УЗВ.

Ужо ёсць каманда мясцовых каардынатараў УЗВ, вядуцца перамовы пра інфармацыйную і іншую падтрымку з кіраўніцтвам беларускіх і польскіх арганізацый і інстытуцый у Беластоку, Варшаве, Вроцлаве і Гданьску.

У хуткім часе з’явіцца старонка Беларускага УЗВ у адной з сацыяльных сетак.