На фотавыставе прадстаўленыя працы, выкананыя на працягу 2005–2010 гг. Большасць з іх зробленая падчас экспедыцый у аддаленыя раёны Беларусі, якія праводзіла група фатографаў у складзе Уладзіміра Парфянка, Дзмітрыя Караля, Ігара Пешахонава, Сяргея Кажамякіна. Фатографы рабілі самастойнае фатаграфічнае даследаванне беларускага культурнага і візуальнага ландшафту. Па словах Таццяны Бембель, такое візуальнае даследаванне Беларусі можна супрацьпаставіць гламурнаму, параднаму міфу пра нас саміх і нашую краіну, міфу, у якім «чур, я прынцэса!».

Людзі траплялі ў кадр выпадкова. На фоне пабудоваў і пейзажу забытых, адчужаных мясцін яны выглядаюць такімі шчымліва блізкімі, пазнавальнымі і разам з тым непадзельнымі з тым месцам і часам, у якіх іх засняў фатограф. У. Парфянок называе іх «геніямі месца, людзьмі, якія трымаюць, ахоўваюць гэтае месца».

Большасць месцічаў не разумелі, што адбываецца. Яны па рознаму рэагавалі на новых людзей з фотакамерамі. Аўтар прыгадаў як адзін дзядок абклаў яго мацюкамі за таптанне гароду, а іншы адвёў у хату і падарыў гляк. «Я звяртаўся да іх з просьбай пастаяць і падумаць пра нешта сваё», — расказвае І. Пешахонаў.

Д. Кароль звярнуў увагу гледачоў на выпадковасць зробленых кадраў, якія нагадваюць «сустрэчу без абавязкаў», пасля якой прыходзіць усведамленне каштоўнасці не толькі чалавека, але і той прасторы, у якой ён быў заспеты.
Што для нас, жыхароў гораду, ёсць каштоўным па-за эканомікай, палітыкай і побытавым камфортам, адказаць гэтаксама складана, як і разабрацца, што трымае гэтых людзей з фотаздымкаў на месцы і што ёсць каштоўным у такім жыцці для іх. Ціха і непрыкметна мінаюць іх дні на аскепках нашай гістарычнай спадчыны, зарастаюць гароды і зачыняюцца шклатары. Час і гісторыя — бясцэнны набытак, які растрачваецца гэтак жа лёгка і хутка, як кадры, зробленыя лічбавай фотакамерай.

***Пешахонаў Ігар Мікалаевіч (нар. 1966). Нарадзіўся ў Віцебску. Сябра Саюза дызайнераў, савета Беларускага творчага аб’яднання “Фотамастацтва”, заснавальнік фотацэнтра “Мaster”. Галіна прафесійных інтарэсаў — сучаснасць і мінулае беларускай правінцыі, вайна ў Афганістане. Жыве ў Лідзе.

Гарадская мастацкая галерэя Л. Шчамялёва. Час працы: аўторак — субота, 11.00 — 19.00.