17 кастрычніка вучні старэйшых і малодшых класаў беларускай гімназіі імя Уладзіслава Нядзведзкага, што ў Мікашэвічах, віталі трох вядомых беларускіх пісьменнікаў: Анатоля Зэкава, Міколу Чарняўскага і Уладзіміра Мароза. Сустрэча пісьменнікаў з вучнямі адбылася ў межах агульнабеларускай кампаніі “Будзьма”, якая наўпрост накіраваная на папулярызацыю беларускай мовы і культуры сярод шырокіх слаёў грамадства, у тым ліку сярод дзяцей і моладзі.

Падчас сустрэчаў пісьменнікі прэзентавалі свае творы, вялі шматлікія конкурсы, абмяркоўвалі найбольш важныя пытанні, датычныя беларускай літаратуры і яе развіцця. Напрыканцы пісьменнікі правялі агульную сустрэчу з навучэнцамі старэйшых класаў гімназіі, падчас якой адбылося ўручэнне прэміі імя Уладзіслава Нядзведзскага за лепшы твор у рамках літаратурнага конкурсу сярод навучэнцаў гімназіі. Акрамя таго, падчас сустрэчы адбылася літаратурна-музычная вечарына, удзельнікі якой чыталі творы беларускіх аўтараў і выконвалі беларускія песні.

Адзін з наведнікаў гімназіі, пісьменнік Мікола Чарняўскі, які асабіста ведаў Уладзіслава Нядзведзкага, падарыў гімназіі бібліятэчку з кнігамі, перададзенымі яму і падпісанымі асабіста Нядзведзкім.

Па словах Анатоля Зэкава, падобныя мерапрыемствы павінны ладзіцца на рэгулярнай аснове, паколькі “у той сітуацыі, якая склалася вакол беларускай мовы і беларускай культуры, толькі асабістыя сустрэчы моладзі з беларускімі аўтарамі спрыяюць пашырэнню ведаў аб беларускай культуры”. “Дзеці чытаюць кніжкі, падораныя намі, нясуць іх дамоў сваім бацькам, што мае адбітак на іх успрыманні беларускамоўных выданняў. Мы і далей будзем імкнуцца ладзіць падобныя сустрэчы з вучнямі,” – адзначыў пісменнік.