Калі вы раптам яшчэ не вызначыліся, як цікава адсвяткаваць Каляды і Новы год, мы падкажам. Калядныя сутрэчы ды майстар-класы, святочныя экскурсіі ды батлейкі, калядныя спектаклі і кірмашы, канцэрты беларуских музыкаў — выбірайце мерапрыемствы ў сваім горадзе і на свой густ!
Крыніца: nlb.by
Беларусь
Мінск і Мінская вобласць
Гэтымі выходнымі, 24 і 25 снежня, той самы фэст Sprava ладзіць у Мінску Спраўныя Каляды! У праграме: калядны маркет, майстэрня эльфаў, шальныя майстар-класы, лекцыі, смачная ежа ды напоі. А ўвечары пачнуцца канцэрты!
Вас чакае: рэканструкцыя каляднага абыходу, лялечны тэатр «Батлейка», ценявы тэатр «Вяртэп», выраб калядных упрыгожванняў з саломкі, варожбы і іншае. Завітвайце! Будзе цікава!
Запрашаем вас правесці чароўны, казачны калядны час з намі! У Дукорскім маёнтку вас чакаюць пазнавальныя экскурсіі, вясёлыя гульні, жывая музыка і ўтульная атмасфера.
Брэст
Брэст ужо падрыхтаваўся да свят: на квэсце вы абавязкова звернеце на тое больш пільную ўвагу і, вядома, паспаборнічаеце ў логіцы і кемлівасці. І даведаецеся мноства цікавостак пра горад, вандруючы па ягоным цэнтры і рашаючы задачы!
Берасцейскія рамеснікі, мастакі, творцы ды чарадзеі крафту збяруцца на кірмаш, дзе можна прыдбаць навагодніх падарункаў, наведаць файныя творчыя майстар-класы, выпіць глінтвейну, а можа, і атрымаць падарунак — будзе розыгрыш!
Віцебск
24 і 28–31 снежня Віцебскі цэнтр сучаснага мастацтва запрашае да ўдзелу ў дабрачынным калядным праекце «Незвычайныя гісторыі старой шафы».
Падрабязней тут.
З 27 снежня па 7 студзеня (акрамя 31 снежня і 1 студзеня) Ратуша ў Віцебску запрашае на навагодні кірмаш.
Гомель
Джаз і брыльянты! Тысячы агеньчыкаў, усмешкі на мільён, парык з «дожджыка» на галаве, звонкі смех, бліскаўкі на шчоках і прадчуванне свята. Менавіта такім будзе зімовы маркет, дзе можна паглыбіцца ў святочную атмасферу і заззяць ярчэй, чым самыя яркія зоркі.
Гродна
Вас чакае: знаёмства з гісторыяй і традыцыямі Раства Хрыстова, старыя вертэпы (прайграванне сцэн Раства сродкамі мастацтва), наведванне выставы, майстар-клас па стварэнні цацкі на ялінку, дэгустацыя святочнага дэсерту, спектакль «Дарога ў Віфлеем».
У аўторак, 27 снежня, гарадзенскі гісторыка-археалагічны музей першым адкрывае сезон святочных імпрэз і запрашае на Навагоднюю казку ў Новым замку! Вас чакае батлейка,файныя конкурсы, пачастункі ды падаруначкі — і танцы для дзетак!
Полацк
24 снежня ў Полацку лялечны тэатр «Батлейка» запрашае ў Музей традыцыйнага ручнога ткацтва Паазер’я на спектакль «Цар Ірад».
Літва
Вільня
25 снежня ў Вільні адбудзецца калядны канцэрт Юрыя Несцярэнкі і сяброў. Прагучаць аўтарскія, народныя і калядныя песні.
Абяцаюць вясёлую інтэрактыўную казку, у якой ёсць месца творчасці, гульням, песням, сюрпрызам і розыгрышам. Будзе і Дзед Мароз з падарункамі!
Не прапусціце шанец прыняць у сябе сапраўдных калядоўшчыкаў!
Дата: 25 і 29 снежня, 7 студзеня
Ужо хутка праездам з-пад самага раю па вуліцам і праспектам Вільні будзе хадзіць-блудзіць калядны гурт «Беларускі цуд», які з радасцю завітае ў Ваш двор, кватэру ці офіс і прынясе з сабой радаць, дабрабыт і шчасце!
Спяшайцеся ўхапіць калядную Казу за хвост і пакідайце свае заяўкі тут.
Жыве Каляда!
Польшча
Варшава
Беларускія танцы граюць дудар Антось Бельскі, бубначка Наста Бельская і скрыпачка Ліза Рэут. Потым выступіць капэла Od Torunia з куяўскай музыкай, а прыкладна з 22.00 — вольны мікрафон. Калі хто захоча паграць ці паспяваць (народную музыку любога народу) — калі ласка!
Кракаў
Сямейнае каляднае свята «Бэтлеемская зорка» ў Кракаве!
Дата: 2 студзеня
Час: 14.00 і 16.00 (час мясцовы)
Месца: тэатр «Scena Supernova», Mikołaja Zyblikiewicza 12/4, Кракаў
У першы панядзелак новага года, 2 студзеня, беларусаў Кракава запрашаюць на каляднае свята «Бэтлеемская зорка» для дзетак і іх бацькоў з Беларусі, Украіны і Польшчы.
Будзе ўсё як мае быць: батлейка, калядныя спевы, гульні ды розныя файныя неспадзяванкі.
Хор будзе спяваць калядкі, а для самых актыўных абяцаюць майстар-клас па вырабе каляднай зоркі.
Уваход вольны, але ж месцаў абмежавана, таму рэгіструйцеся па спасылцы!
Гданьск
З 25 па 31 снежня беларускі тэатр «Без назвы» ладзіць у Сопаце навагоднія вечарыны для дзяцей «Аперацыя па ратаванні свята». Абяцаюць гульні, чэленджы і флэшмобы, але ўзамен удзельнікі павінны дапамагчы Снягурцы і Завірусе выратаваць свята і сустрэць Дзеда Мароза!
Беласток
Калядоўшчыкі ў Беластоку!
На Каляды беларусы Беластоку калядуюць! Так-так, з казой, каляднай зоркай, песнямі ды пачастункамі!
Калі вы хочаце, каб і да вас у нядзелю, 25 снежня, завіталі каза, мядзведзь, зорканоша, баба і цыганка, то звяртайцеся да спадарыні Марыі.
«Колькасць хат, што мы здолеем абысці, абмежаваная, то спяшайцеся паведаміць пра сваё жаданне быць акалядаванымі», — кажуць арганізатары калядавання.
Сопат
Падчас святочнага майстар-класа дзеткі самі з цеста будуць гатаваць смачныя імбірныя пернікі у форме навагодніх фігурак, а пасля размалёўваць іх!
Уроцлаў
Калядоўшчыкі ва Уроцлаве!
На Каляды беларусы Уроцлава калядуюць! Каб год прыйшоў добры, спакойны ды плённы! Калі вы хочаце, каб і да вас у аўторак, 27 снежня, завіталі каза, мядзведзь, зорканоша, баба і цыганка з найлепшымі каляднымі песнямі ды забавамі, то рэгіструйцеся па спасылцы ды рыхтуйце пачастункі.
Грузія
Тбілісі
Тут можна будзе набыць падарункі сабе і блізкім, пабачыцца са старымі знаёмымі і сустрэць новых, адчуць калядны пах глінтвейну! Завітвайце ўсёй сям’ёй!
Батумі
Спадар Аляксандр прэзентуе вам сваю батлейку і пакажа класічны батлеечны спектакль «Цар Ірад».
Абяцаюць батлейку, аповед пра традыцыі святкавання ў розных краінах, гульні ды сустрэчу Каляднага Дзеда, які ўручыць падарункі (ад бацькоў).
Чэхія
Прага
З 3 па 16 снежня ў Празе пройдуць тры майстар-класы па беларускай традыцыі святкавання Калядаў, а 6 студзеня адбудзецца святочнае калядаванне. Развучванне калядных песень, адпрацоўка сюжэту Калядак і падрыхтоўка неабходнай святочнай атрыбутыкі. Мерапрыемствы арганізаваныя прадстаўніцамі беларускай дыяспары ў Чэхіі.
Беларускія Каляды з Сержуком Доўгушавым у ЗША і Канадзе
Этнамузыка Сяржук Доўгушаў выпрашляецца ў доўгае калядаванне па ЗША і Канадзе.
Вас чакае:
- музычная-інтэрактыўная праграма з карагодамі, музыкай, гульнямі і спевамі;
- cвяточны стол (potluck and BYOB);
- навагодні настрой, сюрпрызы і падарункі;
Спецыяльныя госці — Каза, Мядзьведзь Смаргонскі, Бусел і Чорт!
То далучайцеся па маршруце!
30 снежня — Мінесота
Квіткі коштам 27 даляраў можна набыць па спасылцы
Час: 18.00 (час мясцовы)
Месца: 7980 Wallace Rd. Eden Prairie, MN 55344
7 студзеня — Сан-Францыска
Квіткі коштам 50 даляраў можна набыць па спасылцы.
Час: 16.00 (час мясцовы)
Месца: 2051 Market St, San Francisco, CA 94114
8 студзеня — Портланд
Квіткі коштам ад 25 даляраў можна набыць па спасылцы
Час: 12.30 (час мясцовы)
Месца: Oregon Latvian Community Center, 5500 SW Dosch Rd, Portland, OR 97239
14 студзеня — Філадэльфія
Час і месца паведамяць пазней!
15 студзеня — Маямі
Час і месца паведамяць пазней!
21 студзеня — Таронта
Час і месца паведамяць пазней!
Больш беларускіх падзеяў шукайце ў нашай Афішы.
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
А па гэтай спасылцы можна знайсці афішу бясплатных мерапрыемстваў.
