Скончыўся прыём заявак і працаў на ўдзел у Першым фестывалі беларускамоўнай рэкламы і прамоцыі Adnak!, які стартаваў 15 мая. Тэрмін падачы працаў на Конкурс маладых рэкламістаў заканчваецца 3 ліпеня.
Як і чакалі арганізатары, найбольшая колькасць працаў паступіла ў намінацыю «Дызайн (постэры, паштоўкі, календары, буклеты, лагатыпы, фірмовы стыль)», а таксама «Этыкетка і ўпакоўка». Вельмі сціпла павялі сябе інтэрнэт-рэкламісты. Вялікую цікавасць выклікаў конкурс на найлепшы пераклад слоганаў замежных брэндаў на беларускую мову. У гэтым конкурсе ўзялі ўдзел 38 каманд і асобных крэатыўшчыкаў. На конкурс «Самы беларускамоўны сусветны брэнд» была пададзеная вялікая колькасць працаў ад 7 замежных брэндаў: Renault, Bosch, Henkel (ТМ Ceresit), Samsung і іншыя.
Агульная колькасць заяўленых працаў без уліку гэтых двух конкурсаў склала 116.
У найбліжэйшыя дні ўсе склады журы паводле апублікаваных крытэраў вызначаць фіналістаў і пераможцаў у катэгорыях. Шорт-лісты будуць абвешчаныя 5 ліпеня. Фінальная цырымонія ўзнагароджання адбудзецца 7 ліпеня ў галерэі сучаснага мастацтва «Ў». Пераможцы атрымаюць каштоўныя прызы і дыпломы ад арганізатараў і партнёраў Фестывалю.
Працы ад удзельнікаў Конкурсу маладых рэкламістаў, партнёрам якога з’яўляецца кампанія Velcom, будуць прымацца да 3 ліпеня ўключна.
Конкурс маладых рэкламістаў (абмежаванне па ўзросце ўдзельнікаў — да 28 гадоў уключна) складаецца з двух блокаў. У межах першага блоку канкурсантам неабходна прапанаваць крэатыўную ідэю і рэалізацыю агульнанацыянальнай кампаніі, якая будзе звяртаць увагу шырокіх колаў насельніцтва Рэспублікі Беларусь на пытанні нацыянальнай самаідэнтыфікацыі, становішча сучаснай культуры ў краіне, папулярызаваць веды па гісторыі Беларусі, павялічваць зацікаўленасць у выкарыстанні беларускай мовы. Падрабязны брыф гэтага задання можна спампаваць тут (фармат PDF) або тут (фармат PowerPoint).
У межах другога блоку заданняў партнёр конкурсу кампанія Velcom прапануе распрацаваць крэатыўную ідэю і рэалізацыю рэкламных кампаній для сваіх тарыфных планаў «Кеды», «Паўкеды» (брыф у фармаце PDF можна спампаваць тут) і тарыфных планаў 3G для моладзевай аўдыторыі «Пакаленне 3G Velcom» (брыф у фармаце pdf можна спампаваць тут).
Падрабязнасці аб Конкурсе маладых рэкламістаў чытайце тут.
Усю дадатковую інфармацыю вы можаце атрымаць па тэлефонах +375 29 755-1434, 177-0121, +375 25 978-9787 альбо па адрасе info@adnak.by.
