Пакуль Расія змагаецца з папулярным мэсэнджарам Telegram, беларусы спакойна трымаюць яго на сваіх гаджэтах і выдатна сябе адчуваюць. Але не адной камунікацыяй сэрвіс багаты. Тут сапраўды хапае вельмі карысных каналаў і ботаў, якія зацікавяць любога актыўнага беларуса. Дык на што падпісацца? Мы сабралі для вас найлепшыя варыянты для вашай штодзённай стужкі.
“Беларусь головного мозга” (@belamova)
Цікавы блог пра падзеі Беларусі і не толькі. Апроч асноўных навін і казусаў беларускай рэчаіснасці тут публікуюць розныя прышпілы і здарэнні, якія вартыя ўвагі. Фактычна, гэта добрая кампіляцыя ўсяго, што ў нас адбываецца і вартае той ці іншай увагі, бо тут яшчэ агучваюць розныя надзённыя праблемы нашага краю. Таму калі вам цікавы інфармацыйны пульс Беларусі – падпісвайцеся!
“Чай з малінавым варэннем” (@belteanews)
Любіце жарты, іронію і сарказм? Хочацца пасмяяцца з праблем і казусаў Беларусі? У вас усё добра з нацыянальнай самаіроніяй? Тады гэты канал вам абавязкова спадабаецца. Вядомая гумарыстычная суполка ў сацсетках дабралася і да “Тэлеграма”. Тут вы знойдзеце розныя мемы, коміксы і іншыя жартачкі на тэму беларускай рэчаіснасці і сатырычныя рэакцыі на нейкія мясцовыя падзеі. Калі хочацца пасмяяцца, працягнуць сабе жыццё і пры гэтым у вас усё ў парадку з гумарам, то абавязкова падпісвайцеся!
МКБ (@mkbelarus)
Ад стваральнікаў суполкі “Мая краіна Беларусь”. Гэта канал, які сумяшчае функцыі папярэдніх. Тут вы знойдзеце і навіны, і сатыру, і розныя падборкі з беларускага сеціва на актуальныя тэмы. Кантэнт самабытны, таму паўтораў з мінулымі каналамі не будзе. Ды і знойдзеце для сябе цікавыя спасылкі і факты. Таму вам павінна спадабацца.
1863x (@x1863)
Тут нават не трэба прадстаўленняў. Найлепшы палітычны блог у Тэлеграме. Вельмі зручны спосаб знаёміцца з новымі артыкуламі сайта Эдуарда Пальчыса, а ў якасці бонусу – розныя жарты і цікавосткі ад вядомага блогера. Для аматараў 1863х, а калі яшчэ не знаёмыя з гэтым блогам – абавязкова пазнаёмцеся! Не пашкадуеце!
Перакладчык “Белазар” (@BelazarBot)
Вядомы руска-беларускі і наадварот перакладчык у хуткім доступе! Цяпер не трэба спампоўваць праграму ці заходзіць на сайт – з гэтым проста і хутка справіцца іх тэлеграм-бот. Вам дастаткова ўвесці патрэбнае вам слова, і вы адразу атрымаеце пераклад. Дарэчы, перакладае цэлыя тэксты! А яго галоўны плюс – хуткасць. Вынік вы атрымаеце за лічаныя секунды! Таму калі вам неабходны пераклад, смела дадавайце бота сабе ў стужку!
“Мерзкий Кокобай” (@koko_by)
Калі вы любіце смачна паесці, аматар шукаць новыя месцы і проста гурман, то абавязкова падпішыцеся на вядомага беларускага фудхантара. Тут не толькі агляды і крытыка розных кавярняў і прадуктаў, але і цікавыя навіны са сферы нашай мясцовай кулінарыі. Усім фудхантарам прысвячаецца.
“#Мотолькопомоги: Минск” (@motolkohelp)
Пра мясцовыя праблемы і іх рашэнні ад вядомага блогера Антося Матолькі. Тут можна знайсці цікавыя навіны па гэтай тэме, а таксама даведацца пра петыцыі, якія могуць дапамагчы нашай сталіцы і не толькі стаць лепшымі. Навіны, праблемы і вынікі. Калі вам не пляваць на месца, дзе вы жывяце, і вы хочаце для свайго горада лепшага – падпісвайцеся і знаёмцеся!
Беларусь у мемах. Здаровы сэнс (@belmems)
Проста Беларусь. Проста жарты і мемы. Проста для тых, хто любіць пасмяяцца. Кантэнту шмат, хопіць на ўсіх.
“Беларуский телеграм” (@BelarusTelegram)
Ну і бонус для тых, хто чытае да канца. Вядома, што наша падборка не можа паказаць абсалютна ўсе цікавыя і патрэбныя вам каналы пра Беларусь, таму для пошукаў нечага новага існуе гэты канал. Менавіта тут можна адсачыць новыя суполкі і каналы беларускага “Тэлеграма”, знайсці для сябе нешта карыснае і новае. Таму калі не хапае нечага для вашай ТГ-стужкі – раім звяртацца сюды. Каталог можа дапамагчы.
Багдан Сакалоў для budzma.by
