Беларускі арнамент, увасоблены ў лапікавых карцінах, палатняныя посцілкі як з бабулінай хаты ў вёсцы, абярэгавыя лялькі, зробленыя без іголкі, а побач сучасныя арт-аб’екты з воўны ды дзівосныя аўтарскія пано — усё гэта вырабы ўдзельнікаў Міжнароднага фестывалю «ТэкСтыльны букет». Іх можна пабачыць у Нацыянальным цэнтры сучасных мастацтваў у Мінску да 30 ліпеня. Фестываль папулярызуе не толькі імёны майстроў з розных куткоў Беларусі, але і натхняе гледачоў на пашырэнне выкарыстання тэкстыльных твораў у сучасным дызайне. Усім, хто цікавіцца ткацтвам, тэкстылем і мастацтвам, раім наведаць.
Працы беларускіх майтрых у залях НЦСМ
З гісторыі фестывалю
Выстава, з’яўляецца працягам Міжнароднага фестывалю «ТэкСтыльны букет», які ў гэтым годзе праводзіўся ў Беларусі пяты раз з 14 па 18 чэрвеня. Калі паглыбіцца ў гісторыю правядзення фестывалю, то прыгадваецца хіба прымеркаванне першага фэсту ў 2019 годзе да дня адзінства Беларусі і Расіі. У наступныя гады фестываль стаў больш палітычна-нейтральным, бо даты правядзення былі перасунуты на пазнейшы перыяд і імпрэзы сталі праводзіцца ўжо ў першай палове чэрвеня. Так як фестываль пачынаўся як беларуска-расійскі праект, то значную частку на ТэкСтыльных выставах заўсёды займаюць працы майстроў гэтых дзвюх краін. Не выключэннем стаў і гэты год, калі акрамя беларускіх майстроў на фестываль прывезлі свае працы майстрыхі з Расіі Наталля Цвяткова, Ірына Вароніна, Ганна Макіна, Наталля Кас’янкоўская і інш. Пасля сканчэння фестывалю, працы расійскіх удзельніц не засталіся для агляду на выставе, таму зараз у НЦСМ выстаўляюцца толькі беларускія майстры.
Працы майстрых з Расіі
Якія краіны ўдзельнічаюць у сёлетнім фэсце
За сваю нядоўгую гісторыю «ТэкСтыльны букет» можа пахваліцца вялікай колькасцю аўтараў (больш за 500 майстроў выстаўлялі свае працы на фестывалях) і адносна пярэстай палітрай краін-удзельніц, якая, што праўда, за апошнія гады стала значна радзейшай з-за нядбайных унутраных і знешніх палітычных крокаў кіраўніцтва Беларусі. Так у гэтым годзе на афішы можна пабачыць толькі тры краіны ўдзельніцы — Беларусь, Расія і Аўстрыя. Пры тым апошняя трапіла ў спіс толькі з-за маладзёжнага беларуска-аўстрыйскага праекта «Windows&Bridges».
У сённяшніх умовах, калі арганізатарам выставаў трэба прадстаўляць на зацвярджэнне ў Міністэрства культуры імёны аўтараў і іх працы, гледачам становіцца ўсё цяжэй знайсці творы, якія прымушаюць задумвацца над сэнсам і ідэяй, якую закладае ў іх майстар. Тым больш каштоўныя працы, у якіх адлюстраваныя беларускія традыцыі ды повязь з гісторыяй. Да 30 ліпеня яшчэ ёсць час, каб наведаць выставу ды натхніцца цудоўнымі творамі тэкстыльнага мастацтва. На што асабліва варта звярнуць увагу, расказваем далей.
Творы Надзеі Рэўтовіч, Лідзіі Святкінай і Наталлі Лісоўскай
Калі працы беларускіх прафесійных майстрых Любові Кірылавай і Наталлі Лісоўскай можна часта пабачыць на розных выставах, то творы іншых ўдзельнікаў прымушаюць спыніцца і запомніць для сябе новыя імёны.
Любоў Кірылава «Медзянай гары Гаспадыня»
Традыцыйныя абярэгавыя лялькі ад дзіцячай студыі «Майстрыха.бай»
Працы бабруйскай дзіцячай студыі «Майстрыха.бай» крануць пачуцці кожнага госця выставы.
Вы абавязкова затрымаецеся каля традыцыйных беларускіх абярэгавых лялек надоўга хаця б дзеля таго, каб вызначыцца, якія з іх вам больш падабаюцца.
Працы Яны Янішчыц, Святланы Еўдакіменка, Ганны Непачаловіч і студыі ДПМ «Майстрыха.by»
Ручнікі Святланы Еўдакіменка і Таццяны Місніковай, посцілкі Элі Рудай і Алы Непачаловіч, карункі Яны Янішчыц, традыцыйныя лялькі і гістарычны інвентар з калекцыі дзіцячай студыі «Майстрыха.бай» атрымалася сплесці ў цудоўны колер эмоцый, звязаных з гістарычнай памяццю продкаў.
Працы квілт-клуба «Валошкі»
На выставе можна пабачыць новы праект мінскага квілт-клуба «Валошкі» — «Родны сэрцу горад мой» — творы прысвечаныя Мінску, а таксама натхніцца ўжо вядомымі працамі майстрых клуба. Чароўныя выцінанкі-скарбніцы, фіранкі быццам бы вітражы і працы па матывах слуцкіх паясоў Святланы Шалковай, Ірыны Архангельскай, Людмілы Апенка, Алены Саечнікавай, Таццяны Кузняцовай, Вольгі Матусевіч і інш. майстрых ужо сталі візітнымі карткамі «Валошак».
«Выцінанка-скарбніца натхнення» — калектыўны праект ад квілт-клуба «Валошкі»
Беларуска-аўстрыйски праект «Windows & Bridges»
Акрамя таго, побач з тэкстыльнымі працамі ў традыцыйнай падачы твораў знайшлося месца і для маладзёжнага беларуска-аўстрыйскага праекта «Windows & Bridges». У межах праекта 11 беларускіх і 7 аўстрыйскіх мастакоў напрацягу двух гадоў працавалі над філасофскім разуменнем вокнаў і мастоў.
Маргарыта Шчытнікава інсталяцыя «Паралельныя сусветы» з праекта «Windows & Bridges»
Вокны і масты па задуме куратараў праекта з’яўляюцца як раздзяляючымі так і яднаючымі складнікамі рэчаў ці паняццяў. На першы погляд яны падаюцца нам звычайнымі і зразумелымі рэчамі да моманту, пакуль мы не паглядзім на іх крыху з іншага ракурсу. На выставе ў дзвюх залях выстаўлена больш за 30 прац маладых майстроў, якія паспрабуюць перавярнуць наша ўспрыняцце стандартнага разумення мастоў і вокнаў.
Анастасія Лагуценка, інстраляцыя «Блукаючы па снах» з праекта «Windows & Bridges»
Эмоцыі ў цемры ад Генадзя Фалея
Закране пачуцці гледачоў і твор Генадзя Фалея «Ад вытокаў». Заля, дзе размешчана праца, прымусіць наведвальнікаў застацца сам-на-сам з мелодыямі традыцыйных спеваў і атрымаць сапраўдны беларускі рэлакс ад цемры і спробаў адчуць подых ветра ў працы майстра. Эмоцыі людзей абвастраюцца і гіпербалізуюцца ў суцэльнай цемры, таму праца мастака кранае гледача зусім інакш, чым калі б яна выстаўлялася ў звычайнай светлай залі цэнтра.
Дзе месціцца?
вул. Някрасава, 3
Калі працуе?
З 12 да 20 гадзін да 30 ліпеня (выходныя — панядзелак, аўторак).
Колькі каштуе?
7 руб. — дарослыя; 3 руб. — студэнты, школьнікі, навучэнцы, шматдзентыя сем’і, пенсіянеры; бясплатна — дзецi да 7 год, удзельнікi Вялікай Айчыннай вайны, інваліды, дзецi-сіраты і дзецi, якія засталіся без апекі бацькоў, супрацоўнікi музеяў, члены ICOM, прадстаўнікi СМI (пры прад’яўленні адпаведнага пасведчання).
Колькі часу зойме наведванне?
Каля 1 гадзіны ці больш.
Магдалена Адынец, budzma.org
