Яго называюць самым загадкавым сонграйтарам сучаснай Беларусі і чалавекам-аркестрам. За яго плячыма дзясяткі музычных конкурсаў і перамога на «Басовішчы» ў 2016 годзе. Сваім топам песень Яўген адмыслова падзяліўся з Budzma.org.
1. На першае месца музыка паставіў фінальную песню з вечаровай праграмы для дзяцей “Калыханка” – “Доўгі дзень” на словы Генадзя Бураўкіна, музыку напісаў да яе Народны артыст беларусі, кампазітар Васіль Раінчык. Выконвалі песню спачатку Ядвіга Паплаўская, а ў новай аранжыроўцы – Ліка Ялінская.
Яўген Кучмэйна коратка патлумачыў чаму гэтая песня на першым месцы: “Бо гэта маё дзяцінства”.
2. Другое месца атрымала беларуская народная песня “Вясна красна на ўвесь свет” – “Праз яе бачу вечны росквіт-пачатак жыцця, нешта старажытнае народнае, якое не мае пачатку і канца. Якое вечна скразіць праз жыццё нашага народа”, – сказаў музыка.
Зараз гэтую песню часта выкарыстоўваюць на дзіцячых вясновых ранішніках.
3. Трэцяе месца займае беларуская народная песня “Касіў Ясь канюшыну” – “Бо сонца пячэ апоўдні праз яе”, коратка рызюмаваў Яўген.
Шырокую папулярнасць народная песня здабыла пасля апрацоўкі яе Уладзімірам Мулявіным і выкананнем гуртом “Песняры” ў 1971 годзе. Песня выйшла ў тым жа годзе на “доўгай” пласцінцы ансамбля, якая цягам года стала лідарам па продажах у СССР. З-за высокай папулярнасці песня з’яўляецца ў мультфільме “Ну, погоди” ў эпізодзе 6, калі воўк спрабуе злавіць зайца з дапамогай камбайна.
4. Чацвёртае месца дастаецца таксама Мулявіну і «Песнярам» – песня “Александрына” аўтарства Петруся Броўкі. Зноў музыка рэзюмуе коратка і трапна: “Так выглядае рамантычная песня”.
5. Пятае месца займае песня пра тэлесябра ўсіх беларускіх дзяцей пачатку 1990-х – “Дзед-Барадзед” – таксама з тэлепраграмы “Калыханка”, і для Яўгена зноў-такі гэта цёплыя ўспаміны з дзяцінства.
Музыку напісаў Леанід Захлеўны на словы Артура Вольскага. Сам жа Дзед-Барадзед пэўны час быў лялькай-вядоўцам праграмы “Калыханка” і распавядаў казкі. Самой лялькай кіравалі тры акторы: адзін тузаў за ручкі, другі — за ножкі, а трэці кіраваў мімікай. Аўтарам тэкстаў Дзеда-Барадзеда быў асістэнт рэжысёра Іван Беладубенка. Пасля таго, як ён звольніўся, лялькай ніхто не захацеў займацца, і яе паклалі ў рэквізытарскую. Дзіўным чынам праз нейкі час лялька Дзеда-Барадзеда знікла, і яе больш ніхто не бачыў.
АМ, budzma.org