Любімыя кнігі беларусаў сталі ядомымі. З беларускіх кніг гэта «Людзі на балоце» Івана Мележа, «Дзікае паляванне караля Стаха» Уладзіміра Караткевіча, «Альпiйская балада» Васіля Быкава, піша thinktanks.by.
Сетка кніжных крамаў OZ у гонар свайго 23-годдзя прыгатавала ў Мінску гіганцкі торт з больш як 100 ядомых кніг. І менавіта тых, што любяць чытаць беларусы, — ад «Гары Потэра» і «Гульні прастолаў» да «Дзікага палявання караля Стаха» Уладзіміра Караткевіча і «Радзіва «Прудок» Андруся Горвата.
Торт складаецца з больш чым 100 кніг, якія часцей за ўсё выбіраюць беларусы. Агульная вага дэсерту перавышае 150 кг. Гэта адзін з самых буйных і складаных тартоў, калі-небудзь прыгатаваных у краіне.
«Ядомыя вокладкі атрымалі самыя папулярныя кнігі — тыя, што любяць чытаць беларусы. Гэта класіка, сучасныя раманы, дзіцячая літаратура, фантастыка і фэнтэзі, навукпоп, біяграфіі, гісторыі поспеху і інш.», — распавялі супрацоўнікі OZ.
На торце лёгка адгадваюцца сусветныя бэстсэлеры: «Уладар пярсцёнкаў», «Гары Потэр», «Дзюна», «Хронікі Нарніі» і «Гульня прастолаў» Побач упрыгожаны крэмам «Боская камедыя» Дантэ Аліг’еры, «Партрэт Дарыяна Грэя» Оскара Уайльда і «Вялікі Гэтсбі» Скота Фіцджэральда.
Беларускіх твораў на торце таксама шмат: «Людзі на балоце» Івана Мележа, «Дзікае паляванне караля Стаха» Уладзіміра Караткевіча, «Альпійская балада» Васіля Быкава і «Радзіва «Прудок» Андруся Горвата.
Ядомую вокладку атрымаў і лацінаамерыканскі шэдэўр — «Сто год адзіноты» Габрыэля Маркеса. Сучасную літаратуру прадстаўляюць «Другое жыццё Уве» Фрэдрыка Бакмана і «451 градус па Фарэнгейце» Рэя Брэдберы.
З бісквіту «надрукавалі» і немастацкую літаратуру. Салодкі прысмак надалі біяграфіі Стыва Джобса, Буквару і «Тонкаму мастацтву пафігізму». Не забыты таксама кнігі па псіхалогіі і самаразвіццю — попыт на іх стабільна высокі.
«Торт ста кніг» прадставілі ў краме OZ на Пераможцаў, 3. Пасля прэзентацыі яго падзялілі на кавалачкі і раздалі наведвальнікам. Рэдкі выпадак, калі кнігалюбы змаглі паспрабаваць на смак любімыя творы.
Найстарэйшая інтэрнэт-крама ў Байнэце з’явілася ў 1999 годзе. Назву OZ прыдумалі годам пазней — як напамін пра чароўную краіну Оз з кнігі Лаймена Баўма. Зараз па ўсёй краіне працуе 39 кніжных крам OZ.
