Неўзабаве ў Варшаве стартуе фэст Вольных Беларусаў DaVoli. У межах фэсту 5 жніўня адбудзецца круглы стол «Будзьма беларусамі!», прысвечаны нацыянальнай ідэі беларусаў.

Нацыянальная ідэя: ці патрэбна яна беларусам? Якой яна павінна быць? Ці змянілася нешта з тых часоў, калі яе фармуляваў Ігнат Абдзіраловіч? Як паўплываў на імідж беларусаў і Беларусі 2020 год? Што такое быць беларусам сёння? Вось толькі некаторыя з пытанняў, якія закрануць госці круглага стала «Будзьма беларусамі!». 

Арганізатарам круглага стала выступіў Інстытут беларускай культуры «ІнБелКульт 2.0». Мерапрыемства пройдзе ў Доме спатканняў з гісторыяй (Karowа, 20, Варшава). Пачатак а 19.00.

У круглым стале прымуць удзел:

Ніна Шыдлоўская, старшыня Рады  Супольнасці беларусаў свету «Бацькаўшчына», каардынатарка кампаніі «Будзьма беларусамі!»

Андрэй Радаман, гісторык, спецыяліст па гісторыі права і дзяржаўнасці Вялікага Княства Літоўскага;

Зміцер Лукашук, журналіст Е*р*радыё, аўтар і вядучы праекта «Ідэя Х», аўтар кнігі «Беларуская нацыянальная ідэя»

Павел Баркоўскі, прадстаўнік акадэмічнай філасофскай думкі, кандыдат філасофскіх навук, каардынатар супольнасці «Беларуская філасофская прастора»

Славамір Серакоўскі, польскі публіцыст, сацыёлаг, літаратурны і тэатральны крытык.

Да ўдзелу ў дыскусіі заклікаюцца таксама і ўсе прысутныя. Будзе працаваць «вольны мікрафон».

Неабходна папярэдняя рэгістрацыя.