У польскім мястэчку Гарадок на Падляшшы 17 ліпеня распачаўся шосты фестываль TUTAKA 2026. Сёння ўвечары на сцэне выступяць гурты RIMA, Roots vibracja X Dub Robaj, а таксама Анастасія Рыдлеўская. Агулам на тры дні фестывалю арганізатары запланавалі больш за 50 актыўнасцяў. Сярод іх канцэрты, лекцыі, квізы, прэзентацыі кніг, нефармальныя сустрэчы з музычнымі гуртамі і нават ёга і этнафотасесіі.
Падчас усяго фестывалю будзе працаваць кірмаш, дзе можна набыць вырабы беларускіх рамеснікаў і нацыянальна-арыентаваных брэндаў.
Першыя наведнікі фестывалю прыехалі ў чацвер 16 ліпеня.
«Мы прыехалі ўчора, у чацвер. І днём фестываль ужо жыў сваім жыццём. Было шмат намётаў, людзі спявалі песні, — кажа наведнік фестывалю Цімафей. — Людзі спявалі песні, гатавалі ежу. Фестывалілі ўжо ў чацвер».
Увялі квіткі, змянілі лакацыі і арганізавалі дзіцячую пляцоўку
Сёлетні фестываль адрозніваецца ад папярэдніх. Упершыню ўваход на фестываль не вольны, а па квітках. Таксама адбылася змена фестывальных лакацый і з’явілася дзіцячая пляцоўка.
«У гэтым годзе, апроч квіткоў, у нас з’явілася дзіцячая пляцоўка. Яе арганізавалі дзякуючы дапамозе каманды „Будуй сваё“, куды беларусы пералічвалі 1,5% ад сваіх падаткаў у Польшчы», — сказала кіраўніца праектаў Фундацыі «Тутака» Настасся Суханосік.
Дзіцячая пляцоўка на фестывалі Тутака, арганізаваная дзякуючы дапамозе каманды „Будуй сваё“
Таксама на фестывалі рэарганізавалі размяшчэнне пляцовак. Сцэну перанеслі на паляну, дзе летась размяшчалася намётавае мястэчка. А намётавы лагер — размясцілі побач з лакацыяй, дзе раней стаяла сцэна. Апроч таго, у намётавых мястэчках зрабілі душ з гарачай вадой.
Першыя сустрэчы, дыскусіі і лекцыі
У пятніцу — другі дзень фестывалю можна было ўзяць удзел у нефармальнай сустрэчы з выканаўцамі — Анастасіяй Рыдлеўскай, а таксама падляшскім гуртом з Гарадка RIMA. Размову з музыкамі праводзіла журналістка Марына Савіцкая.
Падчас нефармальнай сустрэчы з Анастасіяй Рыдлеўскай
Гурт RIMA і мадэратарка сустрэчы, журналістка Марына Савіцкая
Святар Аляксандр Кухта распавёў пра беларускую праваслаўную царкву. А на дыскусійных пляцоўках адбываліся размовы пра будучыню Беларусі з удзелам Паўла Латушкі, Яўгена Вапы, Алега Латышонка і іншых.
Святар Аляксандр Кухта
Нагадаем, у межах фестывалю Tutaka ў суботу, 18 ліпеня, адбудзецца сустрэча з аўтарскай камандай праектаў «Трызуб і Пагоня», «Сармат», «Беларусь 18|63» ад грамадскай культурніцкай кампаніі «Будзьма беларусамі» — Кацярынай Ваданосавай, Васілём Калачом і Алесем Кіркевічам.
Час сустрэчы: 15.50-17.20
Мерапрыемства адбудзецца ў біваку паўстанцаў 1863 года клуба гістарычнай рэканструкцыі «Invictus 1863»
Праграму фестывалю можна паглядзець тут.
А.Ш. Budzma.org
