15-16 ліпеня ў другі раз ва ўрочышчы Барык ля Гарадка адбудзецца Фестываль Абуджаных «Tutaka». Мэта фестывалю — выказаць сабе падтрымку, пазнаёміцца з нашай культурай і адзін з адным бліжэй. Але перш за ўсё, каб даць выразны сігнал нашым сябрам у Беларусі, што мы разам з імі ў сваіх думках і дзеяннях.
Фестываль Абуджаных «Тutaka» — гэта наўпроставы нашчадак «Басовішча». Арганізатары фэсту хочуць прыгадаць дух свабоды, які панаваў на паляне Барык побач з Гарадком.
«30 гадоў таму "Басы", сярод іншага, абудзілі беларусаў Падляшша, каб яны маглі з гонарам гаварыць пра сваю ідэнтычнасць і выказваць яе праз сучасную музыку і бел-чырвона-белыя колеры свабоднай Беларусі. У 2020 годзе беларусы Беларусі і дыяспары таксама масава абудзіліся, і бел-чырвона-белы сцяг стаў сімвалам абуджанай, непахіснай, творчай і проста сексуальнай нацыі», — нагадваюць арганізатары фэсту.
Стваральнікі збіраюцца запрасіць на фестываль беларускіх творцаў, не толькі музыкаў, але і людзей тэатру і выяўленчага мастацтва. Асабліва тых, хто стаў сімвалам пераменаў або дзейнічае толькі дзеля падтрымкі гэтых пераменаў.
У сувязі з сітуацыяй ва Украіне, але таксама і згодна з перакананнем стваральнікаў фестывалю, сёлета на фестывалі таксама будуць прадстаўлены ўкраінскія артысты і тэмы, звязаныя з барацьбой Украіны за сваю свабоду. «Мы разумеем, што салідарнасць з Украінай — гэта наш маральны абавязак, але разам з тым мы не можам думаць пра свабоду Беларусі без свабоднай незалежнай Украіны. Толькі праз салідарнасць і супрацу паміж краінамі нашага рэгіёну можна думаць пра далейшае развіццё ва ўзаемнай павазе і разуменні», — падкрэсліваюць арганізатары.
Даведацца падрабязнасці можна на сайце фестывалю.
