У Гродне ўпершыню паказалі унікальны мюзікл «Флейта-чарадзейка» на беларускай мове, у якім разам з прафесійнымі акцёрамі задзейнічаны дзеці з аўтызмам. Спектакль пастаўлены Сямейным інклюзіў-тэатрам «i» пры падтрымцы МДГА «Дзеці. Аўтызм. Бацькі» і кампаніі velcom, паведамілі ў прэс-службе кампаніі.

Мюзікл з поспехам прайшоў у гарадзенскім Драмтэатры. Сямейную казку з «асаблівай» ідэяй ўвасобілі на сцэне каля 40 акцёраў, у тым ліку вядомыя артысты. Найбольшую цікавасць у публікі выклікала гульня: дзеці з аўтызмам выступілі на роўных з усімі астатнімі. Прычым глядач не змог адрозніць звычайнага акцёра ад «асаблівага».

Самае цікавае адбывалася за кулісамі. Юныя акцёры настолькі пасябравалі паміж сабой, што дапамагалі адзін аднаму нават падчас спектакля. Складанасць пастаноўцы надавала і тое, што ўсе акцёры – як дзеці, так і дарослыя – спявалі ўжывую. Паводле слоў мастацкага кіраўніка спектакля Ірыны Пушкаровай, усе дзеці сталі сябрамі, адчулі сябе адной камандай.

У Гродне выступіла абноўленая трупа, да якой дадалося 10 новых хлопчыкаў і дзяўчынак. Сюжэт стаў больш стройным і дынамічным – дзеці спявалі, танцавалі і садзіліся на шпагат. Казачніка адыграў былы акцёр і пастаноўшчык Тэатра юнага гледача, а цяпер рэжысёр Сямейнага інклюзіў-тэатра «i» Ігар Сідорчык. Вобраз феі ўвасобіла музыкант і кіраўнік МДГА «Дзеці. Аўтызм. Бацькі» Таццяна Якаўлева, якая таксама выканала беларускую версію неапалітанскай песні «O sole mio». Мяркуючы па рэакцыі залы, кульмінацыя кранула гледачоў.

П’еса «Флейта-чарадзейка» напісаная на беларускай мове. Сюжэт распавядае пра прыгоды дзяцей, якія прыехалі пагасцяваць да дзядзькі ў вёску і апынуліся ў казачным сусвеце. Дзеці спрабуюць знайсці чароўную флейту, каб выратаваць лес і аднавіць натуральны цыкл прыроды. Рэальны і выдуманы свет цесна пераплецены, а падарожжы дзяцей прыводзяць да нечаканай, але шчаслівай развязкі.

Пастаноўка змяшчае алегорыі і схаваныя сімвалы, таму апынулася цікавай як дзецям, так і дарослым. Адных зацікавіў казачны сюжэт, іншых – падтэкст і незвычайнасць таго, што адбываецца. Драматургам ўдалося паставіць мюзікл, на які цікава прыйсці ўсёй сям’ёй.

Сямейны інклюзіў-тэатр «i» ставіць сваёй мэтай фарміраванне грамадства роўных магчымасцяў. «Пасля спектакля ў людзей мяняецца стаўленне да «асаблівых» дзецяй: многія пачынаюць разумець, што дзеці з аўтызмам нароўні з іншымі могуць выконваць задачы, якія патрабуюць майстэрства, адвагі і кемлівасці, – адзначыў начальнік аддзела карпаратыўных камунікацый velcom Вячаслаў Смірноў. – Дзякуючы такім мерапрыемствам «асаблівыя» дзеці атрымліваюць шанец стаць часткай грамадства, знайсці сябе і рэалізаваць творчы патэнцыял, тады як гледачы могуць выдатна правесці час і атрымаць задавальненне ад убачанага спектакля».

Стваральнікі мюзікла разлічваюць, што п’есы з удзелам дзяцей з аўтызмам стануць традыцыяй і для гарадзенскіх драматургаў. «Мы паказалі, што «асаблівыя» дзеці здольныя «пражываць» ролі і выступаць перад вялікай аўдыторыяй, таксама як і іншыя хлопчыкі і дзяўчынкі. Калі ў Гродне ці любым іншым горадзе з’явяцца такога роду ініцыятывы, то мы з задавальненнем падзелімся сваім вопытам», ­– падкрэсліў прадзюсер мюзікла Леанід Дынерштейн.

Сямейны інклюзіў-тэатр «i» быў сфармаваны ў пачатку 2016 года. Яго заснавальнікамі сталі МДГА «Дзеці. Аўтызм. Бацькі» і кампанія velcom, а падрыхтоўкай юных акцёраў безкаштоўна занялася творчая студыя Ірыны Пушкаровай. Восенню і зімой тэатр выступае з гастролямі па ўсёй Беларусі. «Флейтў-чарадзейку» раней ужо паказалі ў Мінску, Гомелі і Магілёве.

Паводле арганізатараў