У адноўленую сядзібу Міхаіла Клеафаса Агінскага ў Залессі Смаргонскага раёна вяртаюцца балі, паведамляе карэспандэнт БелТА.

Першы дабрачынны “Баль у “Паўночных Афінах” адбудзецца ў музеі-сядзібе 17 студзеня. Праграма балю ўключае ў сябе навучанне танцам эпохі Агінскага, бальнаму цырыманіялу і этыкету. Госці змогуць навучыцца карыстацца веерам. Прадугледжаны салонныя гульні і музычныя сюрпрызы, а таксама дабрачынны аўкцыён. Паводле слоў дырэктара музея Людмілы Градзіцкай, на ім будуць разыграны тры лоты, якія ўяўляюць сабой творы мастацтва мясцовых мастакоў і майстроў.

На балі будзе дзейнічаць дрэс-код. Для дам ён прадугледжвае доўгую вячэрнюю сукенку або бальную сукенку ў стылі 19 стагоддзя. Для кавалераў – фрак, смокінг ці касцюм, белую кашулю, гальштук-бабачку або шыйную хустку.

Сродкі, атрыманыя ад уваходных білетаў і праведзенага аўкцыёну, будуць накіраваны на набыццё экспанатаў для музея-сядзібы і іншыя дабрачынныя мэты.

Набыць білеты можна ў Смаргонскім гісторыка-краязнаўчым музеі і ў дырэкцыі музея Агінскага.

Сядзіба князёў Агінскіх у Залессі Смаргонскага раёна адкрылася пасля рэстаўрацыі 25 верасня 2014 года. Рэстаўратары стварылі максімальна набліжаны выгляд да таго, які маёнтак меў у часы свайго вядомага ўладальніка Міхаіла Клеафаса Агінскага. У бягучым годзе застаецца завяршыць работы па добраўпарадкаванні аранжарэі, устанавіць на адну з вежаў гадзіннік і звон, якія ёсць на гравюры Напалеона Орды, завяршыць камплектацыю гістарычнай мэбляй. Таксама трэба будзе рэканструяваць садова-паркавы комплекс, рэстаўрыраваць гаспадарчыя пабудовы.

Алена Стасюкевіч, БелТА