Падчас руціннага археалагічнага абследавання перад будаўніцтвам газаправода ў самым цэнтры Ушачаў вучоныя з Інстытута гісторыі НАН Беларусі зрабілі дзіўнае адкрыццё — знайшлі сляды старажытнага паселішча, якое існавала тут яшчэ ў X-XI стагоддзях, піша тэлеграм-канал Інстытута гісторыі НАН Беларусі.
Старажытнае селішча знаходзіцца на сучасных агародах. Фота Марата Клімава
У цэнтры гарадскога пасёлка, за 300 метраў ад райвыканкама, падчас назірання зоны па пракладцы газаправода УП «Полацкгазбуд» археолагі выявілі старажытныя пласты, якія адносяцца як мінімум да X–XI стагоддзяў, а ў іх знайшлі фрагменты ганчарнай і ляпной керамікі і бронзавы наканечнік шыйнай грыўны. Гэта сведчыць аб тым, што ў X–XI стагоддзях тут ужо было селішча, і значыць, гэтая знаходка перапісвае гісторыю Ушач, адзначае супрацоўнік Інстытута гісторыі НАН Беларусі Марат Клімаў:
— Раней лічылася, што Ушачы ўпершыню згадваюцца толькі ў XVI стагоддзі ў складзе Полацкага ваяводства. Але цяпер аказалася, што людзі жылі тут на 500 гадоў раней. Гэта мяняе ўяўленне аб гісторыі засялення гэтых зямель.
Фота Марата Клімава
Ушачы вядомыя археалагічнымі раскопкамі курганоў, а старажытныя паселішчы заставаліся «за кадрам». Таму, умоўна, можна сказаць, што знайшлі старажытнае селішча ў саміх Ушачах. Аб астатнім можна меркаваць ужо пасля грунтоўных археалагічных раскопак. Але ці будуць яны, пытанне застаецца адкрытым, кажа Марат Клімаў:
— Помнік гісторыі знаходзіцца на месцы сучасных агародаў жыхароў райцэнтра. З-за гэтага, нажаль, даследаванне можа сутыкнуцца з цяжкасцямі. Але ўжо дакладна можна сказаць, што Ушачы на 500 гадоў старэйшыя.
