21 лютага ў Дзень роднай мовы беларускі музыка Uzari выставіў сваю ўмову, а дакладней запусціў акцыю па папулярызацыі беларускай мовы пад назваю #Umova.

У сваім звароце музыка кажа:

“Некалькі гадоў таму я вырашыў размаўляць на роднай мове, і з кожным днём у маім жыцці мовы ўсё больш і больш. Мой першы альбом “Padziaka Serca”, што выйдзе ў красавіку, таксама будзе цалкам беларускамоўным.

У Дзень роднай мовы я прапаную Вам падтрымаць акцыю #Umova, дзе трэба выканаць некалькі заданняў і перадаць ланцужок далей, каб падтрымаць нашу спадчыну.

Зрабі свой крок да мовы.”

Сэнс акцыі, якая ператвараецца ў гульню, вельмі просты і дазваляе ахапіць вялікую колькасць беларусаў.

 

 

 

Посмотреть эту публикацию в Instagram

Сябры, я запрашаю вас у незвычайную гульню пад назваю #Umova. Якім будзе вынік гэтай гульні – залежыць ад кожнага з нас, таму далучайся! Сёння Дзень роднай мовы, і ў мяне ёсць для вас Умова, якую трэба абавязкова выканаць і перадаць наступным, каб квітнела Беларусь і наша родная беларуская мова. ПАЧЫНАЕМ! Некалькі гадоў таму я пачаў размаўляць па-беларуску, і з кожным днём у маім жыцці беларускай мовы становіцца ўсё больш і больш. Нават мой першы альбом “Padziaka serca”, які выйдзе ў красавіку, будзе цалкам беларускамоўным! Першая #Umova, з якой мы пачнем гульню, называецца “Падзяка”. ⠀ ШТО ТАБЕ ТРЭБА ЗРАБІЦЬ: ⠀ 📍сёння знайсці і сфатаграфавацца з носьбітам беларускай мовы: чалавек, кніга, надпіс, любая рэч; ⠀ 📍апублікаваць фотаздымак у любой сацыяльнай сетцы і напісаць падзяку ці прызнанне ў любові да беларускай мовы, абавязкова дадаўшы хэштэг #Umova; 📍пазначыць мінімум двух чалавек і перадаць ім ужо сваю ўмову, абавязкова прапанаваўшы нейкі падарунак за яе выкананне. ⠀ Пачнем з мяне. Я абяцаю, што калі вы выканаеце маю першую ўмову, то я: ⠀ 📍усім, каго знайду па хэштэгу #Umova, першым дашлю спасылку на мой новы альбом; ⠀ 📍20 чалавек з цікавымі новымі ўмовамі запрашу на эксклюзіўную прэзентацыю майго альбома ў красавіку; ⠀ 📍20 чалавек з яскравымі фотаздымкамі носьбітаў беларускай мовы атрымаюць эксклюзіўныя цішоткі “Padziaka serca”. Гульня пачалася! #uzari #uzarinawrocki #Падзякасэрца #беларускамоўны #Umova

Публикация от UZARI (@uzarinawrocki) 20 Фев 2019 в 11:29 PST

Uzari прапаноўвае ў Дзень роднай мовы знаходзіць і фатаграфавацца з цікавымі ці арыгінальнымі носьбітамі беларускай мовы. Гэта могуць быць як людзі, так і розныя рэчы, надпісы і вырабы, якія сустракаюцца вакол нас.

Фатаздымкі з носьбітамі беларускай мовы трэба публікаваць ва ўласных сацыяльных сетках, а разам з імі гісторыі пра гэтыя носьбіты, уласныя падзякі ці прызнанні ў любові да роднай мовы разам з хэштэгам #Umova, каб адсочваць і далей публікаваць вашыя гісторыі.

А каб акцыя працягвалася як мага даўжэй і ўцягвала новых людзей, варта ў адказ прапаноўваць уласныя новыя ўмовы вашым сябрам і за іх выкананне абавязкова матываваць нейкімі невялікімі падарункамі.

Напрыклад Uzari паабяцаў усім, хто выканае яго ўмову, першым даслаць спасылку на свой альбом “Padziaka serca”, а 20 аўтарам самых цікавых гісторый і фотаздымкаў падарыць фірмовыя цішоткі і запрасіць на эксклюзіўную прэзентацыю альбома ў красавіку ў Мінску.