У Смалявіцкай сярэдняй школе №1 у канцы лютага і пачатку сакавіка праходзілі дні беларускай мовы і культуры. Адным з мерапрыемстваў стала сустрэча з паэткай Верай Буланда. Паэтка выступала ў межах кампаніі “Будзьма беларусамі!”.

Вера Буланда пагутарыла з вучнямі пра паэзію на беларускай мове, пачытала ўласныя вершы і творы іншых аўтараў: Пімена Панчанкі, Ніла Гілевіча, Рыгора Барадуліна, Максіма Багдановіча. Пяцікласнікі даведаліся, што каб пісаць вершы, трэба спачатку добра валодаць мовай.

З сталі каваць, гартаваць гібкі верш,

Абрабіць яго трэба з цярпеннем,

Як ударыш ты ім, ён, як звон зазвініць,

Брызнуць іскры з халодных каменняў.

(Максім Багдановіч)

Вучні зацікавіліся некаторымі цвёрдымі формамі верша, а паэтка прыгадала, як напісала верш, прысвечаны яе бацьку, калі пазнаёмілася з такой формай як Тэрцына:

Я ноччу бацьку зноў сасніла:

Ён у раі – сярод Багоў,

Даміна светлы – не магіла,

Я клікала яго дамоў,

Мо не пачуў, што і не глянуў,

Не разабраў, магчыма, слоў.

Прачнуцца боязна – устану:

Пачнецца дзень – які праклён:

“Як позна-позна, і як рана”…

Мой татка родны – толькі сон.

Таўтаграма таксама зацікавіла вучняў:

Скарыў сасоннік сон,

Слязой сцякла смала…

Сыду сюды, скашу

Страфу сабе, сусвет,

Сама сабе схлушу,

Сабе сатку санет…

На сустрэчы вучні зразумелі, што на роднай мове можна і трэба гаварыць, і на ёй можна пісаць прыгожыя тэксты.

Актыўным удзельнікам сустрэчы былі ўручаны спецыяльныя падарункі ад культурніцкай кампаніі “Будзьма беларусамі!”: паштоўкі “Мы – адметныя”, дыскі з мультыплікацыяй і рознымі цікавосткамі “Будзьма беларусамі!”, торбачкі і майкі.

Тэгі: Смалявічы