Вядомы паэт і бард Алесь Камоцкі зладзіў у Музеі Янкі Купалы адкрыты сяброўскі канцэрт на свой дзень народзінаў і прэзентацыію новай кніжачкі “ Забірай маё лета”. Уступным акордам да вечарыны сталі словы:
“Душа пакіне сваю самоту,
Каб не забыць ніколі пра мілосць!”
У імпрэзе ўзялі ўдзел сябры-музыкі: капэла Алеся Лася, Кася Камоцкая, Алеся Свохіна, Іна Перасецкая, Юры Хілавец і іншыя. У канцэрце прагучалі песні на ідыш і на польскай мове, пераклады вядомых бардаўскіх тэкстаў, аўтарскія лірычна-філасофскія спевы пра каханне. Настальгічныя ноткі навеяў спеў Касі Камоцкай з “Народнага альбома” “ Паляўнічы ты, мой паляўнічы”.
Цудоўнае ўражанне засталося ў публікі ад спеваў Алесі Савохінай і выкананнем рамансаў на вершы рускіх паэтаў ( у тым ліку – Бэлы Ахмадулінай) у перакладзе на беларускую мову Алеся Камоцкага.
Новая кніжачка Алеся Камоцкага аформлена вельмі густоўна. Яе ўпрыгожылі каляровыя фотаздымкі Вадзіма Грудзька. Па задуме яна блізкая да ідэі кнігі Рыгора Барадуліна і фотамастака Джона Кунстадтэра “ Навошта”. Раней выходзілі кнігі Алеся Камоцкага “Глыбіня дажджу”, “Перасьпевы”, “Вяровіца”, том вершаў “Неспадзяванае”, і былі цёпла прынятыя чытачамі .
Выкладчыца БДУКім, вакалістка гурта Dzіvasil Іна Перасецкая зайграла на скрыпцы і выканала некалькі чароўных кампазіцый. Яна і артысты гурта Dzіvasil выступаюць у накірунку этна-эмбіенту. Алесь Лось выканаў танга і іншыя мелодыі, якія былі знойдзены ў экспедыцыях па Ашмяншыне і Вілейшчыне.
Вяльможная пані прывезла букет кветак са свайго лецішча для паэта і барда. “Прыміце гэтыя півоніі як знак удзячнасці за вашыя песні, кнігі і дыскі, якія мы набываем для нашых дзяцей і ўнукаў, і за тое, што вы нясеце ў творчасці прыгожае беларускае слова і добрыя пачуцці.”
Эла Дзвінская, фота аўтара
