Паэтка і перакладчыца Вольга Гапеева падрыхтавала аўдыяальбом з гуртом Fantastic Swimmers, піша reform.news.

Fantastic Swimmers. Фота: Сяргей Рамановіч

Скразная лінія праграмы «Plop-Plop-Plop» — аўтарская дэкламацыя свабодных вершаў, напісаных на нямецкай мове. Па словах Вольгі, атрымалася «цэлая опэра, маштабны і панарамны твор».

Чытанне суправаджаюць упершыню ўжытыя «плыўцамі» нотныя мэлодыі, сэптэт (3 духавыя, 3 струнныя інструменты), раяль, тэрмэнвокс і шумавы хор.

Усяго да працы над альбомам спрычыніліся 20 чалавек, у тым ліку музыкі з Беларусі, Польшчы і ЗША. Запіс адбываўся цягам мінулага года ў варшаўскай Quality Studio.

У выніковым трэклісьце — 18 кампазыцыяў, умоўна падзеленых на два «бакі», агульнай працягласцю 36 хв. Пакуль што аўтары прапануюць азнаёміцца з прэв’ю — «Plop Ouvertüre», а поўная версія альбома выйдзе бліжэй да 2027 года.

 

Нагадаем, што Вольга Гапеева з 2019 года жыве і працуе ў Аўстрыі і Нямеччыне, піша не толькі па-беларуску, але і па-нямецку.