У мінскім выдавецтве «Кнігазбор» пабачыла свет кніга выбраных твораў беларускага паэта, палітычнага і грамадскага дзеяча Сяргея Хмары (Сяргея Сіняка) “Рабінавы хмель”.

Кніга сталася вынікам руплівай працы яе рэдактара, укладальніка, аўтара прадмовы і каментара Сяргея Чыгрына. Наш калега доўгія гады ліставаўся з С. Хмарай. Паэт стала жыў у Таронта (Канада) на эміграцыі з пасляваеннага часу, дзе памёр у 1992 годзе.

Летам 2008 года дачка С. Хмары Магдалена Сіняк са сваім мужам упершыню наведалі радзіму бацькі — вёску Казлоўшчына Дзятлаўскага раёна. А спыніліся яны, натуральна, у Слоніме ў С. Чыгрына. У сярэдзіне 20-х гадоў мінулага стагоддзя С. Хмара арганізаваў на Слонімшчыне 32 гурткі Беларускай сялянска-работніцкай грамады. У Слоніме паэт жыў з канца 30-х і ў пачатку 40-х гадоў. Давялося яму тут і ў турме пасядзець пры паляках. Наогул, за сваю беларускую творчую і палітычную дзейнасць пры паляках, пры немцах і пры саветах С. Хмара-Сіняк адседзеў у турмах каля 11 гадоў.

Вершы, абразкі і згадкі (успаміны) Сяргея Хмары чытаюцца лёгка і з цікавасцю, бо аўтар — таленавіты паэт і літаратар. Да ўсяго, як у кожнага сапраўднага мастака, многія яго творы застаюцца актуальнымі і сёння.