На верхнім ярусе вежы Гедыміна Лідскага замка 18 жніўня адкрылася выстава артэфактаў. На адкрыцці прысутнічалі вядомыя беларускія гісторыкі і археолагі. Аб гэтым паведаміў краязнаўца і журналіст Станіслаў Суднік.

    Артэфакты, знойдзеныя пры раскопках замка. Фотаздымак са старонкі ў фэйсбуку 

«На выставе прадстаўлены артэфакты, знойдзеныя пры раскопках замка. Вяла імпрэзу навуковы супрацоўнік лідскага музею Святлана Драздова. У адкрыцці выставы самы чынны ўдзел узяў кандыдат гістарычных навук Алег Трусаў, які на працягу некалькіх гадоў вёў раскопкі Лідскага замка. Выступалі кіраўнік замкавай адміністрацыі Ганна Некрашэвіч і намеснік дырэктара лідскага музею па навуцы Наталля Хацяновіч. Аздабляла імпрэзу віртуознай ігрой на скрыпцы Наталля Батаргіна, кіраўнік гурта «Скудрынка» — адзначыў Суднік.

Таксам на сустрэчы прысутнічалі аматары гісторыі, мясцовыя краязнаўцы. Выстава будзе працаваць некалькі месяцаў.

Нагадаем, што Лідскі замак быў пабудаваны князям Гедымінам у 1323 годзе. У 1955 ён быў уключаны ў спіс помнікаў архітэктуры. У сярэдзіне 80-х пачалася кансервацыя замку. Над ягонай рэстаўрацыяй працавалі Міхаіл Ткачоў, Алег Трусаў, Аляксандр Краўцэвіч.

Чытайце яшчэ: Чаму Гедымін з’яўляецца бацькам вялікіх князёў Літвы? Распавядаем у «Гісторыі за 5 хвілін»