Паэт Усевалад Сцебурака апублікаваў на сваёй старонцы ў Фэйсбук чарговы верш са сваёй нізкі «Незнаёмаму земляку».
З нізкі «Незнаёмаму земляку»
***
Я люблю вас -
злых і пакрыўджаных,
непрыгожых,
стомленых працай,
пагарджаных і зьненавіджаных,
з невясёлай ды важкай рацыяй.
Несучасных люблю,
песімістаў,
хутаранаў ў вялікім горадзе,
рэтраградаў і нонканфармістаў -
усіх, хто стыне на гэтым холадзе.
Усіх, хто стыне,
у далоні хукае,
не чакае ад долі лепшага,
хто пільнуе, калі пагрукаюць
нехта ў дзьверы
ці нешта ў сэрца.
Тых люблю,
хто заўжды на варце,
тых, каго і сьмерць не падмане,
хто разгледзіць на кожнай карце
рысы краю,
што чэзьне ў тумане...
