Алесь Тодараў на budzma.org распавядае аб тым, як сфармаваць адэкватную самаацэнку, каб у выніку было без перагібаў у любы з бакоў. 

Добра разумець і суадносіць свае рэальныя магчымасці, абмежаванні, навыкі і іншыя якасці з аб’ектыўнай рэальнасцю. Але не кожны чалавек так можа. 

Напрыклад, калі вы хочаце атрымаць павышэнне на працы, то спачатку трэба навучыцца новым і карысным навыкам, і прымяніць іх на практыцы. Не варта прасіць павышэнне проста таму, што вам так захацелася. Не адрывайцеся ад рэальнасці, але кожны дзень спрабуйце стварыць найлепшую версію для сябе. 

Быць упэўненым у сабе, безумоўна вельмі добра. Але мець завышаныя ўяўленні аб сваіх здольнасцях, тое самае што і мець нізкую самаацэнку — адназначна дрэнна. Наіўна думаць, што вы больш таленавіты, разумнейшы, сумленнейшы, або шчаслівы ў шлюбе, чым нейкі іншы чалавек без нейкіх важных для таго падстаў. 

Чаму? 

Адказ просты: згодна са статыстыкай 88% кіроўцаў лічаць сябе сапраўднымі прафесіяналамі, 74% банкіраў ўважаюць сябе добрымі фундатарамі, ну, а 65% людзей на поўным сур’ёзе думаюць, што яны разумнейшыя за большасць. І што па факце? Аварый менш не становіцца, а меркаваць, што вакол нас ходзяць адно толькі заможныя інвестары або геніі мыслення не выпадае. 

Чытайце па тэме: Нізкая самаацэнка: чым гэта небяспечна і як абярнуць свае «недахопы» ў станоўчыя рысы

Каб не было вось гэтага штучнага, нічым не падмацаванага, пачуцця ілюзорнай перавагі, яго трэба прызямляць. Лепш за ўсё гэта рабіць адразу, калі яно пачынае ўзнікаць. І спрабаваць адэкватна ацэньваць свае здольнасці. Бо разумны чалавек з адэкватнай самаацэнкай — гэта той, хто ведае межы сваіх магчымасцяў і можа іх вызначыць пры неабходнасці. Ён ведае таксама і свае слабасці, якія замінаюць яму рухацца наперад. 

Праца над сабой, прадугледжвае і вывярэнне ўзроўню самаацэнкі, калі гэта патрабуецца. Для пачатку складзіце спіс добрых якасцяў. Калі робіце гэта ўпершыню, паспрабуйце не быць надта крытычным у адносінах да сябе. Нічога страшнага, нават калі ў ім раптам апынецца не так і шмат пунктаў. Бывае…

Памятайце, што ў свеце не існуе нейкай канкрэтнай вызначанай нормы, якой трэба адпавядаць. Шукайце тое, што прыдасца менавіта для вас.
Разумны, упэўнены ў сабе чалавек, умее расстаўляць прыярытэты і не ахвяраваць сваім часам і сіламі ва ўгоду іншым. Ён нічога нікому не абяцае, бо нікому нічога не вінны. Нават калі яго прымушаюць нешта паабяцаць. Таму што ён усведамляе, што не хоча трапіць у катэгорыю людзей, якія не стрымліваюць свае абяцанні. 

Чалавек, які капітальна залежыць ад вонкавых абставіў, меркавання іншых і неспрыяльных фактараў, наўрадці здолее ўзяць сабе ў рукі і стаць сапраўдным гаспадаром уласнага жыцця. Імаверна, што ён папоўніць шэрагі няўдачнікаў.

3 якасці, якія робяць з нас няздараў: 

Непаслядоўнасць

Чалавек, які ідзе да мэты крок за крокам і не апускае рукі пры цяжкасцях, у выніку дамагаецца свайго. Ён становіцца шчасліўчыкам, як ва ўласных у вачах, так і для навакольных.

Чалавек, які не мае паслядоўнасці ў сваім жыцці, не адказвае за свае словы і ўчынкі нават перад самым сабой — не будзе варты ніякай павагі. 

Абыякавасць

Яна адгароджвае нас ад людзей бетоннай сцяной. А без людзей у жыцці нічога не складзецца. 

Эмпатыя, спагадлівасць і ветлівасць — прыкметы ўдачлівага і паспяховага чалавека, і ў сілах кожнага паспрабаваць зрабіцца такім ужо зараз. 

Здаецца, у гэтым нічога складанага няма… 

Песімізм

Усё дрэнна, жыццё праходзіць марна — ня рэдка чуем такія словы, або чытаем у сеціве. 

Але рэч у тым, што мы самі ствараем свой свет, таму найперш у нашых інтарэсах лічыць шклянку з вадой напалову поўнай.

Калі маляваць наваколле адно чорнымі фарбамі, то яно такім і будзе.

Каб жыццё стала больш яркім і шчаслівым, а самаацэнка адэкватнай, трэба пачынаць з простых рэчаў: 

— Пастаянна развівацца як асоба. Бо калі ты не развіваешся, а стаіш на месцы, гэта рана ці позна прывядзе да дэградацыі.

— Кожны дзень рабіць хаця б па маленькім кроку да сваёй мэты. Не даваць сабе спуску. Бо без мэты чалавек, як той казаў, хутчэй мёртвы, чым жывы. 

— Знайсці тое, што сапраўды захапляе. Бо дабіцца поспеху можна адно ў тым, што сапраўды любіш. 

Памятайце: чым большага мы заслугоўваем, тым больш якасны наш выбар. А чым больш якасны наш выбар, тым больш прывабнае жыццё мы атрымліваем у выніку. 

Поспехаў! 

Алесь Тодараў, budzma.org