І ў гэтым годзе Белаазёрск гасцінна сустракаў усіх, хто 20 верасня прыехаў святкаваць “Бабіна лета з Нінай Мацяш”.  На Мацяшынскіх  чытаннях  сярод шматлікай публікі  была шырока прадстаўлена сябрына паэткі. Мінскую дэлегацыю ад Саюза беларускіх пісьменнікаў прадстаўлялі першы намеснік Старшыні Алесь Пашкевіч і намеснік Старшыні арганізацыі Усевалад Сцебурака, паэты Анатоль Вярцінскі, Раіса Баравікова, Алесь Камоцкі і Віка Трэнас. З боку Берасцейскай філіі СБП на мерапрыемствах  прысутнічалі Мікола Аляхновіч, Леанід Валасюк, Валянціна Осіпава, Васіль Бэбіш, Яўген Бяласін і Сяргей Амяльчук.  Пісьменнікі ўсклалі кветкі да магілы Ніны Мацяш і ўзялі ўдзел у памінальным маленні, што прайшло ў Белаазёрскім храме.  Перад пачаткам святочнага мерапрыемства, якое адбылося ў малай зале мясцовага Палаца культуры, берасцейскія літаратары ў рамках кампаніі “Будзьма беларусамі!” правялі творчую сустрэчу с навучэнцамі  Белаазёрскай гімназіі. Пісьменнікі пазнаёмілі гімназістаў са сваімі вершамі, падзяліліся цікавымі ўспамінамі пра Ніну Мацяш, адзначылі яе ўклад у беларускую і міравую літаратуру. Валянціна Осіпава правяла сярод вучняў гімназіі віктарыну, прысвечаную 500-годдзю беларускага кнігадрукавання і найбольш актыўным удзельнікам творчай імпрэзы ад кампаніі “Будзьма беларусамі!” уручыла памятныя сувеніры, паштоўкі  і часопісы на беларускай мове.

Ніна Мацяш

Недзе ўзважваецца наш унёсак

у Жыццё ў зямной гэтай юдолi.

Цi адхмарацца калi нябёсы?

Цi нап’ецца сэрца шчасця ўволю?

Будзем помнiць: ледавiк сыходзiць.

Будзем помнiць: i патоп мiнае.

Хоць, здаецца, сiлы на зыходзе,

Крык душы ў пустынi прападае…

Але сiл даецца роўна столькi,

Колькi трэба, каб стрываць пакуту.

Ветрам хiлiцца да голькi голька,

Кожны лiсцiк хоча быць пачутым…

Тэгі: Белаазёрск