Выстава «Мода. Паміж прыгажосцю і прымусам» у Мінску

 

14 лютага ў Нацыянальным цэнтры сучасных мастацтваў адкрываецца выстава «Мода. Паміж прыгажосцю і прымусам».

Праекты, якія складаюць экспазіцыю выставы, не з’яўляюцца маніфестам супраціўлення модзе як культурнаму феномену. Хутчэй яны супрацьстаяць абывальніцкаму погляду на моду як выключна на фабрыку ілюзій, якая дыктуе, вырабляе і шматкроць тыражуе штучныя выявы паспяховага, «прыгожага» жыцця.

Яны прапануюць перайсці ад вузкага разумення функцыі моды як візуалізацыі сацыяльнага статусу да шырэйшага погляду на яе.

У сваіх працах удзельнікі выставы разважаюць пра сувязь моды і мастацтва, масавай культуры, цялеснасці, крытыкуюць fashion-індустрыю і насаджэнне стандартаў прыгажосці, закранаюць экалагічны аспект, феномен адзення ў культуралагічным, сацыяльным, гістарычным аспектах, разважаюць аб fashion-фатаграфіі на стыку моды і актуальнай фатаграфіі, кажуць аб нацыянальнай і самаідэнтычнасці.

У экспазіцыі таксама прадстаўлены прадметы з Веткаўскага музея стараабрадніцтва і беларускіх традыцый.

Наведвальнікі змогуць таксама прайсці тэматычны квэст, а ўнутры выставачнай прасторы іх чакаюць інсталяцыі і інтэрактыўная фотазона.


Выстава працягнецца да 13 красавіка. ⠀