Сёння дзелімся рэцэптам пікантнага ласунку з языком, цыбуляй і агуркамі, які ўзгадваецца ў XVII стагоддзі. Паўторым яго праз чатыры стагоддзі.

Сапраўдны далікатэс на вялікія святы

Язык жывёлаў нашыя продкі ўжывалі ў ежу з тых часоў, як пачалі паляваць, а потым і разводзіць адамашненую скаціну. Спачатку субпрадукт проста варылі з прынадамі, але эвалюцыя кухні закранула і гэты прадукт. Языкі пачалі адбіваць і засольваць, каб максімальна доўга захоўваць, а таксама вэндзілі, адмыслова падрыхтаваўшы мяса да гэтага працэсу.

Першыя стравы з языкоў узгадаў дзяржаўны дзеяч Станіслаў Чарнецкі ў першай кулінарнай кнізе Рэчы Паспалітай «Compendium Ferculorum», дарэчы, ён быў вядомым кухарам, а не толькі чыноўнікам.

Стравы з языка ў Рэчы Паспалітай лічыліся сапраўдным далікатэсам, звычайныя людзі гатавалі з яго смакоцці на вялікія святы: смажылі ў цесце або хлебнай поліўцы, рабілі заліўныя, дадавалі ў каўбасу з іншымі субпрадуктамі, падавалі наўпрост нарэзаным як закуску з салёнымі агуркамі ці цыбуляй. Нават салаты гатавалі з языкоў.

Стравы з языкоў вельмі любілі заможныя людзі. У сваіх працах ХІХ стагоддзя гісторык з Піншчыны, удзельнік паўстання 1794 года Лукаш Галамбёўскі апіша ў адным са сваіх тэкстаў вяселле стражніка вялікага кароннага — Феліцыяна Патоцкага. Каб добра пачаставаць сваіх гасцёй за ўрачыстым сталом, толькі каля 200 языкоў пайшло на стравы, не кажучы пра іншыя прадукты.

Зараз такія закускі папулярныя сярод старажылаў на поўначы Беларусі і Падляшшы.

Як прыгатаваць закуску з языком?

Для пачатку языкі свінні трэба вымыць і крыху зачысціць нажом. Раім не выкарыстоўваць вялікія языкі, яны доўга варацца і стравы з іх не такія далікатныя. Затым языкі трэба зварыць у адмысловым булёне з прынадамі: соль, лаўровыя лісткі, духмяны перац. Пры жаданні можна дадаць моркву і цыбулю для навару, але ў дадзенай страве гэта не абавязкова. Варыць языкі трэба не менш за дзве гадзіны. Потым даць астынуць.

За гэты час можна падрыхтаваць астатнія інгрэдыенты. Цыбулю парэзаць паўкольцамі, выкласці ў міску, абдаць кіпнем і крыху падавіць лыжкай — ад гэтага працэсу цыбуля стане больш далікатнай і пазбавіцца лішняй горычы. Затым дадайце крыху цукру і лыжку воцату, перамяшайце і пакіньце цыбулю на хвілін 20 марынавацца. Гэта дадасць пэўнай пікантнасці будучай страве.

Салёныя ці марынаваныя агуркі тонка парэжце кружочкамі ці саломкаю. Астыглы язык таксама парэзаць, лепш саломкаю. Змалоць прынады: каляндру, чорны перац і соль. Усе інгрэдыенты злучыць у адной місцы, дадаць лыжку гарчыцы зернем, пасыпаць прынадамі. Закуску можна заправіць смятанай па жаданні. Вымешаць і даць страве пастаяць мінімум 30 хвілін.

Гэты ласунак елі самастойна ці з хлебам, але смачней — з грэнкамі. На разагрэтую патэльню пакладзіце кавалачак масла, абсмажце хлеб да хрумсткай скарыначкі з абодвух бакоў. Закуска з языком і хрумсткім хлебам гатова. Частуйцеся самі і частуйце блізкіх.

Смачна есці!

На 4 порцыі закускі нам спатрэбяцца:

Для булёну:

Для закускі:

Калі вам падабаюцца нашыя відэапраекты і аўтарскія артыкулы, вы можаце падтрымаць рэдакцыю «Будзьмы», набыўшы нам кубачак кавы. Гэта дапаможа нам стварыць больш цікавых відэаролікаў і арыгінальных артыкулаў.