Узнагарода будзе ўручацца перакладчыкам за мастацкую перакладную кнігу, якая была апублікаваная ў годзе, што папярэднічае году намінацыі на гэтую прэмію. У выключных выпадках, калі пераклад на беларускую мову рабіўся некалькімі асобамі, прэмія можа быць падзеленая паміж імі.
Намінаваць прэтэндэнтаў на прэмію могуць выдаўцы, творчыя аб’яднанні і самі перакладчыкі. На іх ляжыць абавязак прадставіць да 15 верасня на разгляд журы прэміі электронныя версіі і два папяровыя асобнікі намінаваных кніг. Папяровыя асобнікі прымаюцца па адрасе Саюза беларускіх пісьменнікаў (220012, Мінск, вул. Кузьмы Чорнага, 31-906), электронныя варыянты – на адрас: konkurs.pierakladau@gmail.com
Прэмія за найлепшую кнігу ў жанры мастацкага перакладу заснаваная ў гонар выдатнага беларускага літаратурнага перакладчыка Карласа Шэрмана (1934 – 2005) і носіць яго імя. Плануецца, што першая цырымонія ўзнагароджання адбудзецца ў дзень нараджэння Карласа Шэрмана, 25 кастрычніка.
Склад журы будзе абвешчаны дадаткова.
Сузаснавальнікамі прэміі з’яўляюцца ГА “Саюз беларускіх пісьменнікаў”, Беларускі ПЭН-Цэнтр і Міжнародны дабрачынны фонд “Вяртанне”.
Каардынатар прэміі – Таццяна Нядбай, +375 29 6768736
Прэс-служба ГА “Саюз беларускіх пісьменнікаў”
