У спісах затрыманых з’явілася прозвішча былой дацэнткі кафедры італьянскай мовы ў МДЛУ Наталлі Дулінай, паведамляюць праваабаронцы. Падрабязнасці і прычыны затрымання пакуль невядомыя. Цяпер яна знаходзіцца ў Ленінскім РУУСе.
Наталля Дуліна адседзела 15 сутак за ўдзел у антываеннай акцыі пратэсту 27 лютага. Пасля гэтага яна распавядала пра здзекі ў ЦІП на Акрэсціна:
«На адной з акцый падыходзіць да мяне адзін сілавік і кажа: «Я б гэтых усіх бандэраўцаў задушыў. А ты пачвара»»
«Быў і адзін сумнавядомы пэрсанаж — Яўген Урублеўскі. Яшчэ да суду ў адной жанчыны моцна балела галава, яна папрасіла таблетку; хтосьці папрасіў туалетнай паперы. Дык ён так раззлаваўся, пачаў хаміць. Потым Урублеўскі вывеў гэту жанчыну ў іншы пакой і ўдарыў галавой аб сцяну».
«Большасьць супрацоўнікаў нас ненавідзела, яны страшэнна раздражняліся, калі бачылі, што мы іх не баімся. Адна супрацоўніца нібыта і спачувала, але вельмі моцна лаялася матам. Доктарка таксама жудасна лаялася».