20 кастрычніка 2012 года а 14-й гадзіне ў Дзяржаўным музеі гісторыі беларускай літаратуры адбудзецца адкрыццё літаратурна-мастацкай выставы “Ходзіць Сон ля вакон…”, прысвечанай беларускім калыханкам.
Калыханка… Менавіта з яе немаўля пачынае знаёміцца з навакольным светам, са светам маці. Фальклорная ці літаратурная, паэтычная ці, нават, празаічная, забаўляльная ці павучальная… Бясспрэчна адно, цікавасць да калыханкі не знікне ніколі. Спачатку мы засынаем пад мілагучныя спевы матулі ці бабулі, пасля – пад знаёмыя галасы персанажаў з дзіцячай тэлеперадачы “Калыханка”, якая вырасціла не адно пакаленне маленькіх гледачоў. А калі мы становімся дарослымі, то самі спяваем калыханкі сваім дзецям.
На выставе будуць прадстаўлены літаграфіі знакамітай мастачкі Алены Лось, ілюстрацыі да кнігі “А па сенцах ходзіць Бай…” мастачкі Марысі Лось, аўтографы калыханак беларускіх пісьменнікаў, а таксама лялькі з архіва Белтэлерадыёкампаніі, якія ўдзельнічалі ў розных выпусках праграмы “Калыханка”.
Усіх, хто жадае апынуцца ў краіне Сну, чакае сустрэча з фальклорным гуртом “Верацёнца”, з аўтарамі беларускіх літаратурных калыханак – Генадзем Бураўкіным, Уладзімірам Карызнам, Раісай Баравіковай, Віктарам Шніпам, Леанідам Дранько-Майсюком і інш., а таксама “жывая студыя” са стваральнікамі і героямі тэлеперадачы “Калыханка” – Сан Маляванычам, Феяй Сноў, медзведзянём Топам, лісічкай Янай і казачнай істотай Сплюшыкам. Напрыканцы, па традыцыі, маленькіх наведвальнікаў чакае беларуская казка, якую распавядзе “голас калыханкі” Беларускага радыё, народная артыстка Рэспублікі Беларусь Марыя Захарэвіч.
Месца правядзення: Дзяржаўны музей гісторыі беларускай літаратуры (вул. М.Багдановіча, 13, Траецкае прадмесце).
Кантактны тэлефон: (017) 334-56-21.
